Գեղեցիկ, առեղծվածային, հմայիչ, միշտ բարետես ու խնամված. դերասան Կիանու Ռիվզն այն տղամարդկանցից է, ում մինչ ծերություն սիրում են կանայք։ Բրուտալ, ռոմանտիկ տղամարդու կերպարը ձգում է եւ հետաքրքրում։ Այդպես էր միչեւ վերջերս։ Հոլիվուդյան դերասանը լրջորեն շփոթեցրել է երկրպագուներին՝ «Բիլ եւ Թեդ» ֆիլմի նկարահանման հրապարակում հայտնվելով «իրոկեզ» սանրվածքով, մորուքով եւ բաց որովայնով։ Արտիստի լուսանկարները հրապարակվել են Twitter-ում։
Երկրպագուներին հատկապես զարմացրել է աստղի գիրությունը։ Կիանուն այն մարդկանցից է, որոնք հետեւում են քաշին՝ ճիշտ է սնվում, լուրջ ջանքեր գործադրում մարզասրահում։ Առայժմ հայտնի չէ՝ արդյոք դերասանի կերպարանափոխությունը կապված է նոր դերի հետ, թե նրա անձնական որոշումն է։ Երկրպագուները սոցիալական ցանցերում ակտիվորեն քննարկում են լուսանկարը՝ տարբեր ենթադրություններ անելով։
Կիանու Ռիվզն այժմ նկարահանվում է «Բիլի եւ Թեդի անհավանական արկածները» կատակերգության շարունակությունում, որում մարմնավորում է գլխավոր հերոսներից մեկին։ Ֆիլմի թողարկումը ծրագրվում է 2020թ.-ին։ Նոր ֆիլմում հին ընկերներ Բիլն ու Թեդը ժամանակի մեջ ճանապարհորդության կմեկնեն՝ ոգեշնչում գտնելու համար հանուն մարդկության փրկության։
Թեդի դերում Կիանու Ռիվզի մասնակցությամբ «Բիլ եւ Թեդ» շարքի առաջին ֆիլմը թողարկվել է 1989թ.-ին։ 1991թ.-ին վարձույթ է հանձնվել երկրորդ մասը։ Երրորդի թողարկումը նախատեսված է 2020թ.-ին։
Լուսանկարները՝ Getty images