Կոմիտասյան կատարումներ, հայ երաժշտության լեգենդար դեսպանին նվիրված տեսաֆիլմ եւ ծանոթություն հայկական ազգային երաժշտական գործիքներին. այսօր՝ սեպտեմբերի 26-ին, Կոմիտաս Վարդապետի ծննդյան 150-ամյակի առթիվ «Տաշիր Սթրիթ» առեւտրի կենտրոնում բացվել է Գրականության եւ արվեստի թանգարանի «Կախարդական սրինգ» ազգային նվագարանների հոբելյանական ցուցադրությունը:
Քանոն, սազ, քամանի, ուդ, նաղարա եւ հայկական հնչեղություն ունեցող այլ երաժշտական գործիքներ ներկայացված են իրենց նկարագրությամբ եւ կարեւորությամբ: Հատկանշական է, որ ցուցահանդեսին ներկայացված շուրջ երկու տասնյակ թանգարանային ցուցանմուշներից մեկը Կոմիտաս Վարդապետի «եղեգնյա փողը» սրինգն է:
Ի դեպ, Վարդապետի հոբելյանական տարեդարձը նշվելու է միջոցառումների լայն շարքով:
Առեւտրի կենտրոնի այցելուներն այսօր կարող են ոչ միայն տեսնել եւ ծանոթանալ հայ երաժշտության պատմական նմուշներին, այլեւ վայելել Կոմիտասի երաժշտությունը ողջ օրվա ընթացում:
Սյունե Առաքելյան