Վրաստանի ռեգբիի հավաքականի մարզիչ Միլթոն Հեյգը եւ թիմի ավագ Ջաբա Բրեգվաձեն քննադատել են աշխարհի առաջնության կազմակերպիչներին, հայտնում է Lenta.ru՝ վկայակոչելով լրատվամիջոցներին։
Մարզիկներին եւ երկրպագուներին զայրացրել է փաստը, որ յուրաքանչյուր անգամ, երբ վրացի խաղացողները փորձեր էին իրականացնում, հնչում էր Վալերի Մելաձեի «Чего ты хочешь от меня» երգը, որը հնչում է ռուսերենով։ «Այդ խաղի ընթացքում շատ անգամներ ռուսական երաժշտություն էին միացնում։ Լավ կլիներ, եթե այդ սխալը չկրկնվեր»,- ասել է Բրեգվաձեն։
Մարզիկները հույս են հայտնել, որ այլեւս նման բան չի կրկնվի։ «Խաղի ընթացքում օգտագործված երաժշտությունը ռուսական էր։ Այդ առնչությամբ ես ցանկանում եմ հստակ ընդգծել, որ Ռուսաստանը Վրաստան չէ, իսկ Վրաստանը Ռուսաստան չէ։ Մենք տարբեր լեզուներ, տարբեր մշակույթներ ունենք... Լավ կլիներ, եթե ռեգբիի միջազգային խորհուրդը ավելի շատ ուշադրություն ցուցաբերի այդ հարցին»,- ասել է Հեյգը։