Հոլիվուդյան ճանաչված դերասան, կինոաշխարհի գլխավոր ամուրիներից եւ սրտակերներից մեկը՝ Ջերարդ Բաթլերն, այսօր՝ նոյեմբերի 13-ին նշում է տարեդարձը: «300 սպարտացիներ», «Հ.Գ. ես քեզ սիրում եմ», «Մերկ ճշմարտություն», «Լոնդոնի անկումը», «Օպերայի ուրվականը», «Լարա Քրոֆթ», «Միսիս Բրաուն» եւ մի շարք այլ հայտնի ֆիլմերի աստղը բոլորեց 50-ամյակը:
Քչերին է հայտնի, բայց Հոլիվուդի ամենացանկալի տղամարդկանցից մեկն ունի իրավաբանական կրթություն: Նա որոշ ժամանակ աշխատել է իրավաբանական գրասենյակում, սակայն պարբերաբար հարբած վիճակում աշխատանքի ներկայանալու պատճառով Ջերարդին ազատել են պաշտոնից: Այնուամենայնիվ, դերասանը, կարծես թե, այդքան էլ չի ափսոսում իրավաբանական գրասենյակի ձախողված աշխատանքի համար: Նա խոստովանել է, որ այդ տարիներին ատում էր կոստյումը եւ մի կերպ էր այդ տեսքով ներկայանում աշխատանքի:
Ջերարդ Բաթլերի հայտնի մտքերից մի քանիսը ներկայացնում ենք ձեր ուշադրությանը:
«Ես սիրում եմ հումորի լավ զգացում ունեցող աղջկան, որն ինքնավստահ է, բայց միեւնույն ժամանակ մանկական քաղցրություն ունի իր մեջ: Նման աղջիկը հալեցնում է իմ սիրտը»:
«Միշտ էլ ավելի հետաքրքիր է ստեղծել ֆիլմեր այն ամենի մասին, ինչն արդիական է քո հասարակության մեջ՝ քաղաքական իրադրությունը, սպառնալիքները, քանի որ հենց դրան է հանդիսատեսն արձագանքում, հենց դա է նրանց այդ պահին հետաքրքրում»:
«Ճիշտ դիմակ ընտրելն օգնում է… Մենք շատ դիմակների միջով ենք անցնում: Դրանք հատուկ կաշվից են պատրաստված, որոնք մաշելու դեպքում պետք է նոր դիմակ գտնես»:
«Ես ստիպված եմ եղել ինձ արդարացնել շատ ու շատ մարդկանց առաջ»:
«Շոտլանդիայում ես չեմ առանձնանում, նման եմ ամեն երկրորդ տղամարդուն, իսկ Ամերիկայում ինձ ընկալում են որպես շատ ուժեղ, թիկնեղ տղամարդու»:
«Սիրում եմ միայնակ ժամանակ անցկացնել եւ մտավոր ճանապարհորդել այնպիսի վայրերում, որտեղ չգիտեմ էլ՝ ինչ կա»:
«Դեռ մանկությունից սիրել եմ լինել ուշադրության կենտրոնում, բայց որքան ինձ հիշում եմ, միշտ պայքարել եմ խոչընդոտների, վախերի ու թուլության դեմ»:
«Որպես դերասան՝ շատ դժվարությամբ եմ պատրաստվում ցանկացած դերի»:
Լուսանկարները՝ Ian West/PA Images, Getty Images,Vanity Fair