«Մանկական Եվրատեսիլ»-ի Ռուսաստանի ներկայացուցիչը բեմում կորցրել է գիտակցությունը

«Մանկական Եվրատեսիլ 2019» մրցույթի Ռուսաստանի ներկայացուցիչը՝ 13-ամյա Դենբերել Օրժակը, հոսպիտալացվել է Լեհաստանի հիվանդանոցներից մեկն այն բանից հետո, երբ առաջին փորձի ընթացքում ուշագնաց է եղել։ Այս մասին «ՌԻԱ Նովոստի»-ին հայտնել է Իգոր Կրուտոյի ակադեմիայի մամուլի ծառայությունից։

Ավելի վաղ հաղորդվում էր, որ Arena Gliwice բեմում առաջին փորձի ընթացքում Օրժակը թուլություն է զգացել, բժիշկներ են հրավիրվել, որոնք տղային հանգիստ են խորհուրդ տվել։ Դենբերելի կողքին են նրա տատիկը եւ ռուսական պատվիրակության ներկայացուցիչները։ «Դենբերելն ուշագնաց է եղել առաջին փորձի ընթացքում։ Նրան շտապօգնության մեքենայով տեղափոխել են տեղի հիվանդանոց։ Այժմ նա բժիշկների հսկողության տակ է»,- հայտնել են մամուլի ծառայությունից։

Տղան հետազոտություն է անցել։ Նրան հանգիւստ են խորհուրդ տվել, եւ նա կմնա հիվանդանոցում բուժանձնակազմի հսկողության ներքո։

«Մանկական Եվրատեսիլ 2019» մրցույթի եզրափակիչը տեղի կունենա նոյեմբերի 24-ին Լեհաստանի Գլիվիցե քաղաքում։ Հայաստանը մրցույթում ներկայացնում է Կարինա Իգնատյանը «Colors of your dream» երգով։

Լուսանկարը՝  junioreurovision.tv/Thomas Hanses, PR НТВ