Դերասանուհի Էլեն Ազնավուրյանը, որը հեռուստադիտողների լայն զանգվածին հայտնի է «Պատվից առավել» հեռուստասերիալից, այս շրջանում վայելում է անձնական երջանկությունը: Դերասանուհու ընտրյալը մասնագիտությամբ բժիշկ Բորիս Մկրտչյանն է, որին Էլենը համարում է 2019-ի իր կարեւորագույն ձեռքբերումը:
NEWS.am STYLE-ի հետ զրույցում դերասանուհին պատմել է սիրելիի հետ ծանոթության եւ ներկայիս զբաղվածության մասին:
«Մեր ծանոթությունն ինձ համար պատահական է եղել, բայց իր համար` ոչ այնքան, քանի որ հանդիպումը հենց ինքն էր կազմակերպել`մեր ընդհանուր ընկերների միջոցով: Մինչ այդ, երբեք չէինք հանդիպել ու, նույնիսկ, հեռակա ծանոթ չէինք: Ինձ պատահական էր տեսել, որից հետո պարզել, որ ընդհանուր շատ ծանոթներ ու ընկերներ ունենք»:
Հարցին, թե Բորիսն իրեն որ հատկանիշով է գրավել, Էլենը պատասխանում է.
«Անկեղծ` չեմ կարող ասել, թե իր մեջ ինձ կոնկրետ որ հատկանիշն է դուր գալիս: Չեմ էլ զգացել` երբ ու ինչպես սիրահարվեցի: Ինձ համար նա օժտված է ամենալավ հատկանիշներով»:
Նաեւ խոստովանում է, որ ընտրյալը խանդոտ է.
«Ոչ միայն մասնագիտությանս հարցում` ընդհանրապես խանդոտ է, ես էլ իրեն չեմ զիջում այդ հարցում (ծիծաղում է)»:
Այս պահին Էլենը չի նկարահանվում, թեեւ իր խոսքով` առաջարկ եղել է.
«Ներկա պահին հանդես եմ գալիս որպես ֆոտոմոդել, բայց էկրանային հետագա գործունեությանս մասին հիմա հստակ ոչինչ ասել չեմ կարող, չնայած` այս ընթացքում առաջարկներ ունեցել եմ: Հիմա այլ զբաղմունք ունեմ` Instagram-ում իմ փոքրիկ բիզնեսով եմ զբաղված, նաեւ` դասերովս»:
Իսկ հարցին, թե երբ են ծրագրում ամուսնանալ, պատասխանեց.
«Հետագա ծրագրերի մասին դեռեւս չեմ կարող խոսել»:
Սյունե Առաքելյան
Լուսանկարները տրամադրել է Էլեն Ազնավուրյանը