«Գիշատիչ թռչուններ. Հարլի Քվինի ցնցող պատմությունը»
Մարգո Ռոբին վերադառնում է Հարլի Քվինի դերին, եւ այս անգամ նա ընկերուհիների հետ է:
«Ինքնասպանների ջոկատի» իրադարձություններից հետո Հարլի Քվինը Ջոկերից բաժանվել է: Այդ ընթացքում պատանի Կասանդրա Քեյնը գտնում է հանցավոր պարագլուխ Սեւ Դիմակին պատկանող ալմաստը: Այս պատճառով Հարլին միանում է Սեւ Դեղձանիկին, Որսորդուհուն եւ Ռենե Մոնտոյային՝ Կասանդրային պաշտպանելու համար:
Պրեմիերան՝ փետրվարի 6-ին:
«Ջենթլմեններ»
Գայ Ռիչին մեզ ցույց կտա «իսկական» ջենթլմենների շարժուձեւերը:
Օքսֆորդի տաղանդավոր շրջանավարտը, իր յուրահատուկ խելքն ու աներեւակայելի հանդգնությունը կիրառելով, մտահղացել է հարստանալու անօրինական սխեմա՝ աղքատացած անգլիական արիստոկրատիայի կալվածքների օգտագործմամբ: Սակայն երբ նա որոշում է իր բիզնեսը վաճառել ԱՄՆ-ից միլիարդատերերի ազդեցիկ գերդաստանին, նրա ճանապարհին են հայտնվում ոչ պակաս հմայիչ, բայց դաժան ջենթլմեններ:
Էկրաններին՝ փետրվարի 13-ից:
«Դոկտոր Դուլիթլի զարմանալի ճանապարհորդությունը»
Դոկտոր Դուլիթլը 7 տարի առաջ կնոջը կորցրել էր: Հիմա նա վարում է ճգնավորի կենսակերպ՝ թաքնվելով իր կալվածքի բարձր պատերի հետեւում: Դուլիթլի հավաքածուի էկզոտիկ կենդանիները նրա միակ ընկերակիցներն են:
Բայց երբ անհայտ հիվանդությունը սպառնում է պատանի թագուհու կյանքին, դոկտոր Դուլիթլը ստիպված լքում է իր ապաստարանը եւ անհավանական ճանապարհորդության մեկնում դեպի առասպելական կղզի:
Կինոթատրոններում դիտեք փետրվարի 20-ից:
«Սոնիկը` կինոյում»
Մենք շատ ուրախ ենք Զիմ Քերիի` մեծ կինո վերադառնալու կապակցությամբ: Հուսանք, որ այս կինոնկարը շատ ավելի լավը կլինի, քան «Պոկեմոն. դետեկտիվ Պիկաչուն» համանման ֆիլմը:
Խենթ վառ կապույտ ոզնի Սոնիկը իր նոր լավագույն ընկեր Թոմ Վաչովսկու հետ միասին ծանոթանում է Երկրի վրա կյանքի դժվարություններին եւ դիմակայում չարագործ բժիշկ Ռոբոտնիկին, ով ցանկանում է գերեվարել Սոնիկին եւ օգտագործել նրա անսահման գերունակությունները:
Պրեմիերան՝ փետրվարի 20-ին:
«Ակիմբոյի թնդանոթները»
Վստահ եմ, որ շատերը մտածել են` իսկ ինչ կլիներ, եթե Հարի Փոթերի հերոսը հրազեն ունենար…
Մայլզը սովորական տեսախաղեր ստեղծող էր, մինչեւ նրան չներքաշեցին արյունոտ արկածի մեջ: Անծանոթները ներխուժեցին նրա տուն, ձեռքերին երկու ատրճանակ գամեցին եւ առեւանգեցին նրա ընկերուհուն: Այժմ Մայլզը պետք է կռվի ընդհատակյա գոյատեւման խաղերի անխիղճ չեմպիոնուհի Նիքսի հետ:
Էկրաններին՝ փետրվարի 27-ից:
Հաճելի դիտում
Նորայր Նազարյան