Սկանդալ Ռուսաստանում. ամերիկյան խմբի վրա ձվեր ու լոլիկ են նետել, ոստիկանությունում՝ հարցաքննել, նաեւ փորձել են խեղդել ամերիկյան դրոշով

Ամերիկյան սկանդալային Bloodhound Gang խմբի անդամների վրա նեխած ձվեր եւ լոլիկ են նետել: Հիշեցնենք, որ Օդեսայում համերգի ժամանակ խմբի բաս կիթառահարը Ռուսաստանի դրոշը մտցրել էր տաբատի մեջ, հետույքը սրբել դրանով, իսկ հետո նետել հանդիսատեսի ուղղությամբ: Gazeta.ru-ի փոխանցմամբ, խմբին արգելել են ելույթ ունենալ KUBANA փառատոնին:

Ամերիկացիներին ճանապարհելու մասին իր Twitter-ում գրել է շրջանի ղեկավար Ալեքսանդր Տկաչովը:

«Պատմեցին, թե Կուբանի երիտասարդությունն ինչպես է «արժանիորեն» ճանապարհել ամերիկացիներին: Նրանց վրա ձվեր են նետել: Հյուրանոցից ստիպված են եղել ամոթահար փախչել հետնամուտքից, բայց այնտեղ էլ են նրանց դիմավորել: Օդանավակայանում՝ նույնպես»,- գրել է Տկաչովը:

Ռուսական ոստիկանությունն իր հերթին Bloodhound Gang խմբի 42-ամյա բասիստ Ջարեդ Հասսելհոֆին հարցաքննել է «ռուսական դրոշը պղծելու» փաստի առիթով: Նյութերը փոխանցվել են դատախազություն՝ որոշում կայացնելու համար:

Մինչ այդ, «Единая Россия» կուսակցության պատգամավորները ցանկանում են ամերիկյան խմբի երաժիշտներին քրեական պատասխանատվության ենթարկել՝ «ռուսական դրոշն անարգելու համար»:

Անապայի օդանավակայանում Bloodhound Gang-ի երաժիշտների վրա հարձակվել են արդեն կազակները: Այս մասին տեղեկացնում է «Комсомольская правда» պարբերականը:

Երբ խմբի անդամները սպասասրահում են եղել, նրանց են մոտեցել հինգ կազակներ: Լեզվակռիվը վերածվել է ծեծկռտուքի: Հարձակվողները փորձել են երաժիշտներին ԱՄՆ դրոշով խեղդել: Կողմերին բաժանել է ոստիկանությունը:

Ըստ РИА «Новости» գործակալության, Կուբանի կազակների բանակը (ԿԿԲ) դեռեւս պաշտոնապես չի հաստատում, որ Անապայի օդանավակայանում Bloodhound Gang խմբի վրա հարձակվել են հենց կազակները:

«Հաստատել, որ նրանք հենց կազակներ են եղել, առայժմ չենք կարող: Նրանք եղել են ոչ թե կազակների համազգեստով, այլ «կազակ» գրությամբ շապիկներով»,- ասել են ԿԿԲ-ում, իսկ միջադեպն անվանել «ժողովրդական զայրույթի պոռթկում»: