«Ես չեմ հավատում ամբողջությամբ բնական կանանց գոյությանը». Դոնաթելա Վերսաչեն այսօր դարձավ 65 տարեկան (ֆոտո)
17:25 2 մայիսի, 2020Versace նորաձեւության տան գլխավոր դիզայներ Դոնաթելա Վերսաչեն այսօր՝ մայիսի 2-ին, նշում է ծննդյան տարեդարձը: Հայտնի իտալուհին, որը նորաձեւության աշխարհի ամենաճանաչված ու ազդեցիկ դեմքերից է, դարձավ 65 տարեկան:
Դոնաթելան աշխարհահռչակ դիզայներ, Versace տան հիմնադիր Ջիաննի Վերսաչեի կրտսեր քույրն է: Երբ եղբայրը հինադրել է նորաձեւության տունը, Դոնաթելան այնտեղ սկսել է աշխատել՝ որպես PR մենեջեր: Ասում են՝ Վերսաչեն տարբեր հաստիքներում ղեկավարներ էր նշանակում միայն իր հարազատներին. նա չէր վստահում օտար մարդկանց:
Եղբոր սպանությունից երեք ամիս անց (Ջիաննի Վերսաչեն սպանվել է 1997 թ-ին) Դոնաթելան թողարկել է Versace ապրանքանիշի ներքո իր առաջին հավաքածուն: Դիզայները խոստովանել է, որ չի կարողանա գերազանցել եղբորը, բայց փորձել է Versace-ի հավաքածուն դարձնել ավելի կանացի եւ սեքսուալ՝ խուսափելով ագրեսիվ երանգներից՝ միեւնույն ժամանակ հավատարիմ մնալով բրենդի որդեգրած շքեղ եւ փոքր-ինչ էրոտիկ շեշտադրմանը:
Ձեր ուշադրությանն ենք ներկայացնում Դոնաթելա Վերսաչեի հայտնի մեջբերումներից մի քանիսը:
«Չպետք է կրկնօրինակել այն, ինչ տեսնում ենք: Պետք է փորձենք գտնել ոճի զգացողությունն ինքներս մեր մեջ, որպեսզի հավատանք մեր սեփական ուժերին»:
«Նորաձեւությունը զենք է, որը կարող ես գործածել, երբ ունես դրա կարիքը»:
«Լավ չէ, երբ կուլ ես գնում ուրիշների կարծիքին: Պետք է հավատաս ինքդ քեզ»:
«Ստեղծարարությունը ծնվում է մտքերի կոնֆլիկտից»:
«Իմ ոճի մեջ ոչ մի բարդ բան չկա՝ բարձրակրունկներ, կիպ շալվար եւ ադամանդներ»:
«Հարմարավետ լինելը չի մտնում նորաձեւության պատկերացումների մեջ: Եթե ուզում ես հարմարավետ զգալ, մնա տանը քո գիշերազգեստի մեջ»:
«Մեր օրերում կոստյումը վաղուց չի բնորոշում գործարարին, կամ էլ լայն շապիկը՝ ռոքերին: Նույն մարդը կարող է եւ առաջինը կրել, եւ երկրորդը»:
«Բրենդի համար շատ կարեւոր է տարիներ շարունակ ինքնությունը պահպանելը, սակայն կարեւոր է նաեւ զարգանալը. ժամանակը շատ արագ է փոխվում»:
«Ես միշտ եմ մտածում գլամուրի մասին: Առավոտյան արթնանում եմ արդեն գլամուրային մտքերով»:
«Բնակա՞ն… Ի՞նչ է բնականը: Ես չեմ հավատում ամբողջությամբ բնական կանանց գոյությանը: Ինձ համար բնական է միայն բանջարեղենը»:
«Նորաձեւության երեք ամենամեծ սխալներն են՝ էժանագին կոստյումը, կոշիկներն ու շապիկները: Ձեր գումարը որակով բաների վրա ծախսեք»:
«Ինձ ոգեշնչում է գեղեցկությունը, իսկ ես, կարելի է ասել, ամեն տեսակի գեղեցկություն սիրում եմ. կարծում եմ՝ այն, իսկապես, գալիս է մարդու ներսից»:
Լուսանկարները՝ Դոնաթելա Վերսաչեի ինստագրամյան էջից