«Հիմա եմ հասկանում, թե ինչու են ասում, որ երեխան ամենամեծ հրաշքն է». Մարինա Մնացականյանն ու Սեյրան Մովսիսյանը սպասում են իրենց առաջնեկին

Դերասանական հայտնի զույգ Սեյրան Մովսիսյանն ու Մարինա Մնացականյանը սպասում են իրենց առաջնեկին: Երիտասարդ ամուսինները որդի են ունենալու, որը լույս աշխարհ կգա ձմռանը:

NEWS.am STYLE-ի հետ զրույցում Մարինան նշեց, որ աննկարագրելի զգացողություններ ունի եւ իրեն շատ լավ է զգում նոր կարգավիճակում: «Հղիությանս մասին իմացել եմ շատ պատահական: Երբ իմացա, սկզբի պահին ոչինչ չէի զգում, չէի գիտակցում. միգուցե, շատերն ինձ կհասկանան: Երբ ամեն ինչ հաստատվեց, նոր միայն Սեյրանին հայտնեցի: Ի դեպ, անակնկալ կերպով եմ դա արել, բայց չեմ ցանկանում բարձրաձայնել, թե ինչպես»,- ասաց դերասանուհին` շարունակելով,- «Երբ դեռ նոր էինք ամուսնացել, մեր ընտանիքում չկար երեխայի մասին խոսակցություն, ու երբ իմացանք, որ նման հեքիաթային հրաշք է մեզ սպասվում, մեր երջանկությունը կրկնապատկվեց, ու հիմա եմ հասկանում, թե ինչու են ասում, որ երեխան ամենամեծ հրաշքն է: Սա այն զգացողությունն է, որը բառերով չես կարող նկարագրել»:

Մարինան նշեց, որ ինքն ու Սեյրանը շատ ուրախ են, որ որդի են ունենալու, բայց իրենց համար երեխայի սեռը միեւնույն է եղել. «Մեզ համար երեխայի սեռը կարեւոր չէր, միշտ էլ նշել ենք, որ ամենակարեւորը` երեխան լինի առողջ: Ես` ինքս, չեմ պատկերացրել, որ որդի եմ ունենալու, որովհետեւ քույրեր ունեմ, միշտ աղջիկներով եմ շրջապատված եղել, բայց շատ էի ոգեւորվել այս լուրից, Սեյրանն էլ, բնականաբար, շատ է ուրախացել»:

Թե ինչ են անվանելու փոքրիկին, զույգը դեռ չի կողմնորոշվել, բայց արդեն ակտիվորեն մտածում են այդ հարցի շուրջ. «Ունենք անվան մի քանի տարբերակ, բայց դեռ չենք կողմնորոշվում... Երեւի` երբ ծնվի, նրան կտեսնենք ու կհասկանանք` ինչ անունով կնքել»,- ասաց Մարինան:

Սյունե Առաքելյան

Լուսանկարները տրամադրել է Մարինա Մնացականյանը