Հայ հայտնի դերասանի դուստրը հինգերորդ անգամ «Emmy Award»-ի մրցանակակիր է դարձել
10:09 22 հունիսի, 2020Հայ դերասան ու ռեժիսոր Արթուր Էլբակյանի դուստրը՝ ԱՄՆ-ում հայտնի պրոդյուսեր եւ լրագրող Անուշ Էլբակյանը, հինգերորդ անգամ արժանացել է ամերիկյան հեռուստատեսային ոլորտի բարձրագույն մրցանակին՝ «Emmy Award»-ի։
«Boston Globe»-ի պրոդյուսերը երկու մրցանակ է ստացել «Ամեն ինչ փոխվում է. Քեյփ Քոդում կլիմայի փոփոխությունը» վավերագրական ֆիլմի համար։ «Շատ հուզված եմ, որ երեկ երեկոյան «Էմմի»-ի երկու մրցանակ ենք հաղթել Քեյփ Քոդում կլիմայի փոփոխության վերաբերյալ վավերագրական տեսանյութի համար»,- Facebook-ում գրել է նա։
Անուշ Էլբակյանն ամերիկյան «Boston Globe» պարբերականի լրագրողն է ու պրոդյուսեր։ Նա նախկինում մասնակցել է «Boston Globe» մարաթոնին ահաբեկչական հարձակումների լուսաբանման վերաբերյալ եւ իր թիմի հետ Պուլիտցերյան մրցանակի արժանացել։
2016թ.-ին նա արժանացել է «Էմմի» մրցանակի «Մի օր Լեոյի կյանքից» («A Day in Life of Leo») ֆիլմի համար։ Էլբակյանը արժանացել է նաեւ Online Journalism Award համացանցային լրագրության ասոցիացիայի մրցանակի՝ որպես հրատապ նորությունների լավագույն տեսաբան։