Իմ պատմությունը. «Ինձ հարկավոր է տղամարդ, ում կողքին իսկապես կին կզգամ»

NEWS.am STYLE-ի խմբագրությունն ընթերցողներից բազմիցս նամակներ էր ստանում, ովքեր առաջարկում էին բացել նոր խորագիր, որտեղ յուրաքանչյուր ցանկացող անորոշ հասցեատերերի շրջանակին ուղղված կարճ էսսեի, նամակի միջոցով կարող է ինքնարտահայտվել, ներկայացնել կյանքի մասին փիլիսոփայական մտորումները եւ այլն:

Կայքի խմբագրությունը հիշեցնում է, որ այսուհետ ձեզանից յուրաքանչյուրը կարող է մեզ ուղարկել սեփական պատմությունը [email protected] հասցեով (կարելի է նաեւ լուսանկարներով), իսկ մենք անպայման այն կտեղադրենք մեր կայքում՝ ցանկության դեպքում պահպանելով անանունությունը: Ամենից պատկերավոր, հուզիչ կամ արձագանք ստացած շարադրանքը խմբագրության կողմից մրցանակ կստանա:

Ահա վերջերս էլեկտրոնային փոստով ստացված եւս մեկ պատմություն:

«Չգիտեմ՝ ինչպես սկսել պատմությունս: 1.5 տարի առաջ էր, երբ հանդիպեցինք: Ես լուրջ հարաբերությունների էի ձգտում, քանի որ կարծում եմ, որ կնոջ իսկական երջանկությունն ընտանիքի մեջ է: Եվ քանի որ տարիներ առաջ կատարվել էր ընտանիք կազմելու իմ երազանքը, բայց հետո միայնակ էի մնացել փոքրիկիս հետ, ավելի շատ էի ցանկանում, որ երեխաս մեծանա առողջ ու երջանիկ ընտանիքում, որ հետագայում իմ անվան հետ կապված բամբասանքներն աղջկաս չխանգարեն ու իր մոր համար ամաչելու առիթ չդառնան:

Նա ամուսնալուծված է, երկու տղա ունի: Մեր յուրաքանչյուր հանդիպումից հետո զգում եմ, որ վախենում է կյանքն ինձ հետ կապել: Նա ամուսնալուծվել է անհավատարմության եւ խանդի պատճառով, ինչի գլխավոր հեղինակը հենց ինքն է եղել…

Սկզբում մեր հանդիպումները կրքոտ էին, ռոմանտիկ, ես չէի պատկերացնում կյանքս առանց նրա: Ամեն ինչ հրաշալի էր, բայց սիրո հարցում ես իմ տեսակետն ունեի, այսինքն՝ լուրջ հարաբերություններ էի ցանկանում, որը նրա կողմից առայժմ բացակայում է: Բացատրում է, որ ընտանիք կազմելու համար պետք է միմյանց լավ ճանաչել, որ հարաբերություններում սերն ամենակարեւորը չէ եւ առաջարկում է որոշ ժամանակ պարզապես ապրել իրար համար, որպեսզի հետագայում, եթե չկարողանանք համատեղ կյանք կառուցել, ինքն իր ծնողների ու հարազատների առջեւ չկորցնի հեղինակությունը: Բայց ես չեմ ցանկանում հանուն սիրո ապրել նրա հետ եւ մեր հարաբերությունները թաքցնել բոլորից…

Ինձ իսկապես օգնություն է պետք: Հասկանում եմ, որ կինը չպետք է տղամարդուն նման առաջարկ անի: Բացի այդ, ինձ միայն ամուսնություն հարկավոր չէ, այլ տղամարդ, ում կողքին ինձ իսկապես կին կզգամ: Բայց եւ ցանկանում եմ հասկանալ, թե այս պարագայում ինչպես պետք է վարվեմ… Նախապես շնորհակալ եմ»: