Եղիսաբեթ Երկրորդին հսկող էլիտար գնդի գվարդիականի մոտ կոկաին է հայտնաբերվել
18:12 31 հուլիսի, 2020Քոլսդթրիմյան գվարդիայի ծառայողը, որի պարտականություններից մեկը Մեծ Բրիտանիայի Եղիսաբեթ Երկրորդ թագուհու կեցավայրը հսկելն է, ձերբակալվել է, երբ նրա մոտ ինը պարկ կոկաին ու կետամին են գտել։ Ամեն ինչ բացահայտվել է, երբ Սենթ Ջեյմսի պալատի լոգասենյակում սպիտակ փոշի է հայտնաբերվել։
Իրավապահ մարմինները խուզարկել են նրա սենյակն ու մեքենան եւ զինծառայողի իրերի շարքում հինգ պարկ կոկաին եւ չորս պարկ կետամին գտել։
Բրիտանական բանակում հաստատել են գվարդիական զինվորի ձերբակալման փաստը, սակայն հրաժարվել են այլ մեկնաբանություն տալ։ Փաստի առիթով հետաքննություն է ընթանում, ձերբակալվածը ժամանակավորապես հեռացված է ծառայությունից։
Քոլսդթրիմյան գվարդիան ստեղծվել է 1650թ.-ին՝ Օլիվեր Կրոմվելի հրամանով եւ համարվում է բրիտանական բանակի հնագույն, անդադար գործող հետեւակային գունդը։ Ստորաբաժանման պարտականությունների շարքում են բրիտանական միապետների պալատների, այդ թվում Վինձորի եւ Բուքինգհեմյան պալատների հսկումը։