Էկրանի ամենահայտնի «տղամարդ-կնոջը»՝ Թութսիին, մարմնավորող դերասան Դասթին Հոֆմանն այսօր՝ օգոստոսի 8-ին, նշում է ծննդյան 83-ամյակը:
Այն, որ կյանքում իր կոչումն արվեստն է, դերասանը հասկացել է դեռեւս մանուկ հասակից՝ իր ուժերը փորձելով երաժշտական ասպարեզում, բայց ավելի ուշ մտափոխվել է՝ ընտրելով դերասանության ուղին: Նրան հաջողություն են բերել «Շրջանավարտը», «Անձրեւի մարդը», «Կրամերն ընդդեմ Կրամերի», «Կեսգիշերային կովբոյը» եւ այլ ֆիլմեր, որոնց մեջ, անխոս, հատուկ դեր ունի «Թութսի» կատակերգությունը:
Հոֆմանն արժանացել է կինոոլորտի ամենահեղինակավոր մրցանակներին, այդ թվում՝ «Օսկար», «Ոսկե Գլոբուս», «Էմմի» եւ British Academy Film Awards:
Ներկայացնում ենք դերասանի՝ տարբեր ժամանակների հետաքրքիր մեջբերումներից մի քանիսը:
«Հաջողակ լինելու լավագույն կողմերից մեկն այն է, որ ես էլ չեմ վախենում մեռնելուց: Երբ դու աստղ ես, կարող ես հաշվել, թե արդեն մահացած ես»:
«Երբ դու մեծ տաղանդ ունես, այն աստիճանաբար վերածվում է հրեշի: Դու այլեւս չես լինում ընտանիքի մարդ, ամուսին, հոգատար մեկը...»:
«Ես որոշեցի դառնալ դերասան, որովհետեւ դպրոցում ձախողակ էի, եւ ինձ բարձր գնահատական էր պետք»:
«Ես ինձ խաբված եմ զգում, որովհետեւ երբեք չեմ կարողանա հղիանալ, իմ ներսում կրել երեխայի եւ կրծքով կերակրել նրան»:
«Միֆը ստեղծված է մարդկանց միավորելու համար, իսկ ֆանտազիան՝ օտար դարձնելու»:
«Կյանքի համար ամենակարեւոր երկու բաղադրիչներն են՝ արեւի լույսն ու կոկոսի կաթը»:
«Մարդիկ անընդհատ վերածնվում են, ու ես չեմ կարողանում հասկանալ, թե ինչպես կարելի է ձանձրանալ: Ես հասկանում եմ, թե ինչպես մարդ կարող է դեպրեսիայի ենթարկվել, բայց ձանձրույթը երբեք չեմ հասկանա»:
«Կարծում եմ՝ ռասիզմն ու անբարոյականությունը միշտ էլ կլինեն հասարակության մեջ, քանի որ մարդիկ, սովորաբար, իրենց հերոս են զգում, երբ ստորացնում են ինչ-որ մեկին»:
Լուսանկարները՝ Ullstein Blid/Getty, Valerie Macon/AFP/Getty Images, Pinterest