Այսօր՝ օգոստեսի 25-ին, ծնվել է Հոլիվուդի ամենալեգենդար դերասաններից մեկը՝ Շոն Քոններին, որի համար այս տարին հոբելյանական է: Դերասանը դարձավ 90 տարեկան:
Քոններին «Օսկարի», BAFTA-ի եւ «Ոսկե Գլոբուսի» դափնեկիր է: Դերասանը նկարահանվել է ավելի, քան 70 ֆիլմում, որոնցից հատկապես հայտնի են՝ Ջեյմս Բոնդի մասին պատմող ֆիլմաշարերը, «Ինդիանա Ջոնսն ու խաչակրաց վերջին արշավանքը», «Անձեռնամխելիները», «Ծուղակը», «Գտնել Ֆորեսթերին» եւ այլն:
Շոն Քոններին իր դերասանական կարիերան ավարտել է 2003 թ-ին: Դերասանի՝ տարբեր տարիների հայտնի մտքերից մի քանիսը ներկայացնում ենք ձեր ուշադրությանը:
«Սերը աշխարհը չի շրջում, բայց պետք է խոստովանեմ, որ այն կյանքի ընթացքը դարձնում է արժեքավոր»:
«Աշխարհում չեմ գտել մի վայր, որտեղ կցանկանայի մնալ ընդմիշտ: Իմ կյանքում լավագույն բանն անընդհատ տեղաշարժվելն է, ու ես միշտ անհամբերությամբ եմ սպասում իմ գալիք ճանապարհորդությանը»:
«Անքննարկելի է այն փաստը, որ քո անցյալն ու շրջապատը մինչեւ կյանքիդ վերջը քո ուղեկիցներն են»:
«Ոչինչ մարտահրավերներից ավելի լավ չի բացահայտում մարդու լավագույն կողմերը»:
«Միգուցե, ես լավագույն դերասանը չեմ, բայց հաստատ այլ բաներում ավելի վատն եմ»:
«Ամեն ինչից շատ ես ուզում եմ լինել մի ծեր մարդ, որն ունի հրաշալի դեմք՝ ինչպես Հիչքոքն ու Պիկասոն»:
«Այո, ընդունում եմ՝ ինձ լավ են վճարում, բայց ոչ այնքան լավ, որքան ես արժանի եմ»:
«Չեմ կարծում՝ երբեւէ կրկին կխաղամ: Այնքան շատ լավ հիշողություններ ունեմ այդ օրերի հետ կապված, բայց դրանք արդեն անցյալում են»:
«Ես դերասան եմ, իսկ դա ուղեղի վիրահատություն չէ: Եթե ես իմ գործը վատ անեմ, մարդիկ չեն կարող գումարը ետ պահանջել»:
«Ոմանք ծերանում են, ոմանք՝ հասունանում»:
Լուսանկարները՝ Facebook-ից, ClivBrunskill/Getty Images, Hdwallsource.com