Հոլիվուդյան հայտնի դերասան Կիանու Ռիվզը, որին շատերը ճանաչում են «Մատրիցա», «Արագություն», «Սատանայի իրավաբանը», «Կոնստանտին», «Քաղցր նոյեմբեր» եւ մի շարք այլ ֆիլմերից, այսօր՝ սեպտեմբերի 2-ին, նշում է ծննդյան 46-ամյակը:
Դերասանը ծնվել է Լիբանանում: Մոր կողմից Կիանուն ունի անգլիական, իսկ հոր կողմից՝ անգլիական, պորտուգալական եւ նույնիսկ չինական արմատներ:
Մինչ դերասան դառնալը Կիանուն իրեն փորձել է տարբեր ոլորտներում, եղել է մենեջեր, նաեւ՝ զբաղվել երաժշտությամբ: 1991 թ-ին Ռիվզը դարձել է Dogstar կոչվող բենդի բաս կիթառահարը: Այսօր խումբը գոյություն չունի, սակայն երաժշտության հանդեպ սերը դերասանի մեջ չի մարել:
1999 թ-ից Կիանուի կյանքում սկսվեց ողբերգությունների շղթան: Նրա ընկերուհին՝ Ջենիֆեր Սայմը, վաղաժամ ծննդաբերերություն ունեցավ. երեխան մահացած ծնվեց։ 18 ամիս անց Ջենիֆերը մահացավ... Նրա մահվան պատճառ դարձավ ողբերգական ավտովթարը:
Երբ նրա քրոջ՝ Քիմի մոտ հայտնաբերեցին արյան լեյկոզ, դերասանը ինքն էր քաջալերում Քիմին, իսկ նրա բուժման համար ծախսել է ավելի քան 5 միլիոն դոլար: Այնուհետեւ Կիանուն բացել է ֆոնդ, որով այժմ աջակցում է քաղցկեղով հիվանդներին:
Երկրպագուները Կիանուին հաճախ «բռնացնում են» ամենապարզ իրավիճակներում, որոնցում, սովորաբար, չես տեսնի հոլիվուդյան աստղերին, օրինակ՝ մետրոյից օգտվելիս, փողոցում բուրգեր ուտելիս եւ այլն: Նրանց դերասանը դուր է գալիս հենց իր պարզությամբ ու անմիջականությամբ:
Ձեր ուշադրությանն ենք ներկայացնում կյանքի մասին Ռիվզի պատկերացումները՝ ելնելով նրա՝ տարբեր տարիների մեջբերումներից:
«Ուշադիր լինելու ամենապարզ գործողությունը կարող է երկար ճանապարհ բացել քո դիմաց»:
«Ես Միքի Մաուսն եմ, որովհետեւ ոչ ոք չգիտի, թե ինչ կա «կոստյումիս» ներսում»:
«Երբ զգում եմ, որ ազատ չեմ ու չեմ կարող անել սրտիս ուզածը, ես, պարզապես, գործում եմ, ես պայքարում եմ դրա դեմ»:
«Երբ քո սիրելի մարդիկ հեռանում են, այդ ժամանակ ես դու միայնակ զգում»:
«Ես ինձ սեքսուալ կամ հմայիչ չեմ համարում, բայց դա չի նշանակում, թե ես անհույս եմ»:
«Մինչեւ ականջները սիրահարված լինելը վտանգավոր բան է, բայց զվարճալի»:
«Մեկին համբուրելը խիստ անձնական ու մտերմիկ պահ է, ու մինչեւ այդ պահը կսկսվի, քո սիրտն արդեն սկսում է ուժեղ բախել»:
«Միշտ էլ հրաշալի է կանանց բացահայտելը՝ նրանց առեղծվածը, երջանկությունն ու խորությունը: Եթե կարողանաս ստիպել կնոջը ժպտալ, կտեսնես Աստծո ստեղծած աշխարհի ամենագեղեցիկ բանը»:
«Երբ դու դերասան ես, ինքնաքննադատությունը հեշտ բան է դառնում: Քեզ, նախ, սկսում են քննադատել կինոքննադատները, ու անկախ նրանից դու համաձայն ես, թե ոչ, մարդիկ սկսում եմ դատել քեզ»:
«Ինչպե՞ս եմ ես դիմակայում ծերությանը՝ շատ պարզ՝ հրաշքով ու սարսափով»:
Լուսանկարները՝ Charles Sykes/Invision/AP, Pinterest, Handout