«Երբեք մի օգտագործեք «էժան» բառը. ցանկացած մեկը կարող է շքեղ տեսք ունենալ անգամ ոչ թանկարժեք հագուստով». Կարլ Լագերֆելդն այսօր կդառնար 87 տարեկան
16:34 10 սեպտեմբերի, 2020Այսօր՝ սեպտեմբերի 10-ին, ծնվել է աշխարհահռչակ դիզայներ, լուսանկարիչ ու հավաքորդ Կարլ Լագերֆելդը: Նորաձեւության արքան, ինչպես նրան անվանում են մոդայի աշխարհում, այսօր կդառնար 87 տարեկան: Գերմանացի դիզայները մինչեւ կյանքի վերջին օրերը եղել է իտալական Fendi եւ ֆրանսիական Chanel նորաձեւության տների գլխավոր դիզայները: Նա 1984 թ-ին նաեւ հիմնել է իր սեփական՝ Karl Lagerfeld նորաձեւության տունը:
Լագերֆելդը մահացել է 2019 թ-ի փետրվարի 19-ին՝ քաղցկեղի հետեւանքով:
Ձեր ուշադրությանն ենք ներկայացնում հայտնի դիզայների հետաքրքիր պատկերացումները՝ նորաձեւության, էժան հագուստի, կյանքի ու տարիքի մասին:
«Գիտե՞ք՝ լուսանկարների ինչն եմ սիրում՝ այն, որ դրանք պահում են այն պահը, որն արդեն գնացել է, որն այլեւս ետ չես բերի»:
«Այդքան շատ զոհողությունների մի դիմիր, քանի որ, եթե զոհես ամեն ինչ, այլեւս ոչինչ չես կարող տալ ինչ-որ մեկին, եւ ոչ ոք քո մասին էլ չի հոգա»:
«Միակ սերը, որին ես հավատում եմ, մայրական սերն է դեպի երեխան»:
«Մարդիկ, որոնք ստեղծագործական աշխատանք են կատարում, միայնակ մնալու կարիք ունեն. չես կարող անընդհատ լինել ուշադրության կենտրոնում եւ պահպանել կրեատիվությունդ: Ինձ նման մարդկանց համար միայնությունը հաղթանակ է»:
«Երբեք մի օգտագործեք «էժան» բառը: Այսօր ցանկացած մեկը կարող է շքեղ տեսք ունենալ անգամ ոչ թանկարժեք հագուստով (հարուստներն էլ են, ի դեպ, այդպես անում): Այսօր ցանկացած մակարդակի վրա կարող ես գտնել լավ դիզայն: Դու կարող ես աշխարհի ամենաշքեղ կերպարը դառնալ սովորական շապիկով ու ջինսով էլ՝ ամեն ինչ քեզանից է կախված»:
«Դիետան միակ խաղն է, որը հաղթում ես կորցնելու շնորհիվ»:
«Ներկայանալի արտաքինը շատ կարեւոր է, որպեսզի մարդկանց ուշադրությունը սեւեռես քո հոգու վրա»:
«Գրքերն, ասես, թմրանյութ լինեն, որոնք չունեն չարաշահման խնդիր: Ես երջանիկ «զոհն եմ» գրքերի»:
«Նորաձեւությունը հագուստի միջոցով արտահայտվող իրականության լեզուն է»:
«Երիտասարդությունը քո ապրելակերպի մասին է, ոչ թե տարիների»:
Մեջբերումները՝ Goodreads.com-ից
Լուսանկարները՝ Getty Images, Dimitrios Kambouris/ Getty Images, V Magazine, Patrick McMullan