«Ձայնը» նախագծի աստղը խուսափել է մահացու ելքով ավտովթարի համար պատժից
23:11 11 սեպտեմբերի, 2020«Ձայնը» շոուի չորրորդ եթերաշրջանի մասնակից Յուլյա Ռայները մեկուկես տարի առաջ վրաերթի է ենթարկել մի մարդու, ով մահացել է, իսկ նա հեռացել է հանցագործության վայրից, ինչի պատճառով բացասական արձագանք է ստացել իր երկրպագուներից: Այս մասին գրում է «СтарХит»-ը։
Ավելի քան երկու տարի այս պատմության մասին չէին հիշում։ Սակայն այսօր լրատվամիջոցներում հաղորդագրություն էր հայտնվել, որ տաքսու վարորդին վրաերթի ենթարկած Յուլյա Ռայներին հաջողվել է խուսափել պատժից: Սեպտեմբերի 8-ին «Ձայնի» նախկին մասնակցի դեմ քրեական գործը փակվել էր։ Ընդ որում, որոշման մեջ նշված է, որ քննությանը չի հաջողվել պարզել պատասխանատվության ենթակա անձին, թեեւ նույն նյութերում գրված է եղել, որ հենց Ռայներն է վրաերթի ենթարկել տաքսու 36-ամյա վարորդ Ռուսլան Յուգային:
«Քրեական գործում ոչ մի տեսագրություն չկա։ Քննիչները վստահեցնում են, որ այդ օրը վթարի վայրում ոչ մի տեսախցիկ չի աշխատել։ Ընդ որում, նրանք նույնիսկ չեն փորձել ձայնագրություններ փնտրել այն վայրից, որտեղ վարորդը նստել է այդ մեքենան։ Տեսանյութերը պահվում են ընդամենը երեք ամիս, եւ այժմ դրանք պարզապես անհնար է գտնել: Դե, ենթադրենք, որ ղեկին Յուլյան չէր, ինչը, իհարկե, անհեթեթություն է, բայց ինչու քննիչները չեն փնտրում վթարի մեղավորին»,- տարակուսած է իրավապաշտպան Սերգեյ Անդրեեւը։
Անդրեեւին հաջողվել է հասնել Յուլյա Ռայների դեմ քրեական գործի վերսկսմանը։ Ռուսլանի հայրը դեռ սպասում է, որ երգչուհին գոնե ներողություն խնդրի իր արարքի համար։ «Ամեն օր ես Յուլյայից զանգի եմ սպասում։ Ես միայն մեկ բան եմ ուզում, որ նա վերջապես ինձնից ու կնոջիցս ներողություն խնդրի», - բողոքել է նա։
Հիշեցնենք, որ նախորդ երեքշաբթի տեղի էր ունեցել Միխայիլ Եֆրեմովի դատավճռի հրապարակումը, որը նման քրեական գործի ֆիգուրանտ էր: Ինչպես հայտնի է, հունիսի 8-ին 56-ամյա դերասանը նստել է իր ավտոմեքենայի ղեկին ալկոհոլային եւ թմրադեղերի ազդեցության տակ, ինչը հանգեցրել է նրա եւ 57-ամյա Սերգեյ Զախարովի բախմանը: Վթարի հետեւանքով երկրորդ վարորդը մահացել է ստացած վնասվածքներից, իսկ Եֆրեմովին տնային կալանքի են ենթարկել այն ժամանակ, երբ հետաքննություն էր ընթանում: