«Որքան էլ, որ քարտեզներն Արարատը տեղադրեն Թուրքիայի սահմանում, այն մեր սուրբ լեռն է եւ միշտ կմնա հայկական». Հովիկ Կեուչկերյանի հարցազրույցը՝ իապանական El Confidencial Digital-ին
23:21 2 նոյեմբերի, 2020«Թղթե տունը»/La Casa De Papel իսպանական հայտնի սերիալում Բոգոտային մարմնավորող հայազգի դերասան Հովիկ Կեուչկերյանի՝ Արցախին ու հայերին աջակցող յութուբյան հոլովակը հայտնվել է իսպանական El Confidencial Digital կայքի ուշադրության կենտրոնում: Լրատվականը հարցազրույց է ունեցել դերասանի հետ, որի ընթացքում Հովիկը խոսել է ադրբեջանա-թուրքական հարձակումների կիզակետում հայտնված Արցախի մասին, ինչպես նաեւ խոստովանել, որ իր ելույթից հետո ապահովության համար թատրոն գնում է անվտանգության աշխատակիցների ուղեկցությամբ:
Դերասանը հարցազրույցում նշել է, որ գոյություն ունեն «երկու հրեշ՝ ի դեմս Թուրքիայի եւ Ադրբեջանի: Ամեն ինչի հետեւում կանգնած է Թուրքիան, եւ նրանք երկուսով շատ ավելի հզոր են, քան Հայաստանը, նրանք ունեն նավթ եւ տարածում են «կեղծ լուրեր»»:
Կեուչկերյանը բացարձակ սուտ է որակել Ադրբեջանի հայտարարությունն այն մասին, թե հայերն են երեք անգամ խախտել հրադադարի պայմանավորվածությունը.
«Դրա դեմ պայքարելը նույնն է, ինչ, օրինակ, Մադրիդի «Ռեալը» դիմակայեր 10-ամյա դպրոցականների ֆուտբոլային թիմին: Դրա դեմ անհնար է պայքարել, եւ մեզ անհրաժեշտ է միջազգային հանրության օգնությունը»:
Կեուչկերյանը նաեւ շեշտել է, որ երբ ոճրագործությունները չեն դատապարտվում, դրանք կրկնվելու հատկություն ունեն, ինչի վառ ապացույցը 1915-ի Հայոց ցեղասպանությունն է եւ այն չդատապարտելու հետեւանքները: Դերասանը շեշտել է, որ Հայաստանն Արցախի հետ միասին ունի 3,150,000 բնակիչ, մինչդեռ Թուրքիան Ադրբեջանի հետ միասին՝ ընդհանուր առմամբ 92 միլիոն բնակիչ, եւ որ միասին Թուրքիան եւ Ադրբեջանն ունեն 25 անգամ ավելի հզոր եւ տեխնոլոգիապես ավելի զարգացած բանակ, քան հայերը:
Դերասանը նաեւ հավելել է, որ դրան գումարած՝ ադրբեջանա-թուրքական կողմն իր շարքերը համալրել է Սիրիայից բերված վարձկաններով եւ ահաբեկիչներով, որոնք պայթեցնում են ինչպես զինվորներին, այնպես էլ՝ խաղաղ բնակիչներին:Դերասանը պնդում է՝ «Սա ավելին է, քան պատերազմը»: Կեուչկերյանը բացատրում է, որ Հայաստանը պատերազմելու կամ որեւէ տարածք ներխուժելու մտադրություն չունի.
«Կան 3,000,000 հայեր, որոնք, պարզապես, ցանկանում են խաղաղ ապրել և բարգավաճել իրենց հայրենիքում՝ աշխարհի բոլոր հայերի սուրբ հողում: Բայց թվում է, որ եւս մեկ անգամ մեզ այդ իրավունքից ուզում են զրկել »,- ասում է նա:
«Մինչ օրս Էրդողանի Թուրքիան չի ճանաչել ցեղասպանությունը, եւ շարունակում է զբաղեցնել Հայաստանի տարածքի 80%-ը՝ ներառյալ Արարատ լեռը, որը որքան էլ, որ քարտեզներն ու սահմանները տեղադրեն Թուրքիայի սահմանում, մեր սուրբ լեռն է եւ այն միշտ կմնա հայկական»,-շարունակում է դերասանը:
Հայտնի սերիալում Բոգոտային մարմնավորող դերասանը եւս մեկ անգամ կոչ է արել կանգնեցնել Էրդողանին, որը կարող է դառնալ «21-րդ դարի Ադոլֆ Հիտլերը».
«Մենք պետք է մեկընդմիշտ արմատախիլ անենք այդ քաղցկեղը՝ ի դեմս Էրդողանի, քանի դեռ այն չի տարածվել, հակառակ դեպքում, վաղ, թե ուշ, աշխարհը ստիպված կլինի գործ ունենալ 21-րդ դարի Ադոլֆ Հիտլերի հետ»:
Հովիկը նաեւ խոստովանել է, որ YouTube-ում իր կոչի տարածումից հետո ստիպված է զբաղվել նաեւ իր անձի պաշտպանությամբ: Դերասանն արդեն մեկ շաբաթից ավել է՝ թատրոն է գնում անվտանգության աշխատակիցների ուղեկցությամբ: