«Մենք ամեն ինչ անում ենք, որ աշխարհում մարդիկ հասկանան, թե ինչ է կատարվում Արցախում եւ մղենք իրենց շիտակ որոշումներ կայացնելուն...»․ Սերժ Թանկյան (վիդեո)

«System of a down» խմբի մենակատար Սերժ Թանկյանը հետեւում է Արցախում ծավալվող իրադարձություններին ու տարբեր հարթակներում հետեւորդներին իրազեկում հակառակորդի գործողությունների մասին։

Երաժիշտն այս անգամ խոսել է Արցախում ընթացող մարտական գործողությունների մասին իրազեկող տեղեկատվական արշավից։ Նա կարեւորել է դրա շարունակությունը։

«Դե ֆակտո ազերիները հարձակվել են Արցախի վրա Թուրքիայի ու վարձկանների հետ, եւ անսպառ ռմբակոծում են Ստեփանակերտը, Շուշին, Մարտակերը, Մարտունին, բոլոր գյուղերը: Մենք ամեն ինչ անում ենք, որ աշխարհում մարդիկ հասկանան, թե ինչ է կատարվում Արցախում եւ մղենք իրենց շիտակ որոշումներ կայացնելուն, որ ի վերջո ճանաչեն Արցախը», - ասում է Սերժ Թանկյանը:

Նա ընդգծել է, որ ուշադիր է պետք լինել եւ աշխարհին ցույց տալ, որ նույն թուրքական ռեժիմն է, որը 105 տարի առաջ փորձել է ոչնչացնել հայերին եւ հիմա իրենց ռումբերով նույնպես փորձում են Արցախի ժողովրդին ոչնչացնել:

«Առաջին անգամ է աշխարհում, որ այս ձեւով ոտքի կանգնած ենք, իբրեւ մեկ ժողովուրդ աշխարհում եւ ձայներնիս բարձր հնչում ա, այսինքն շատ օգուտ կարող ենք անել այս ձեւով, բայց պետք է շարունակենք այս նույն թափով․․․ Իբրեւ մեկ ձայն, իբրեւ մեկ ժողովուրդ աշխատել մեր ազգի երկարաձգման նպատակներով», - ընդգծել է երաժիշտը։

Նա շեշտել է, որ կարեւորում է՝ օտարները հասկանան, թե ինչ է կատարվում Արցախում, ինչ է կատարվում մեր ժողովրդի հետ։ Այդ իսկ պատճառով երաժիշտն ու նրա ընկերները սոցիալական հարթակներում կիսվում, վերահրատարակում են նյութեր, որպեսզի այդ հարթակներում եւս ավելի հզոր լինենք։

«Թշնամին ոչ միայն արգելված ռազմամթերք օգտագործում է, բայց նաեւ բնություն է սպանում․․․», - շարունակել է Թանկյանը։

Տեսանյութը՝ Arm Gov Youtube-յան ալիքից