Երգիչ Արամեն ֆեյբուքյան իր էջում դիմել է հետեւորդներին՝ կոչ անելով համախմբված լինելու: Երգիչը հորդորել է լինել հանդուրժող միմյանց նկատմամբ:
«Սիրելի՛ հայրենակիցներ, իմ ազնիվ ու խելացի հայ ժողովուրդ:
Այսօր մենք ապրում ենք մի դաժան ժամանակաշրջանում։ Մեզ պարտադրեցին, որպեսզի մենք անցնենք շատ դժվարությունների միջով՝ համաճարակ, պատերազմ, իսկ հիմա էլ ներքին պառակտում՝ հայրենասերների և դավաճանների:
Ես՝ որպես հայ ազգի երգիչ, եւ մարդ, որ ժամանակին վերադարձել է Հայաստան ապրելու, արարելու եւ շենացնելու, ցանկանում եմ իմ խոսքն ասել.
Խնդրում եմ, սիրե՛ք միմյանց…
Ստանալով ինչ-որ ինֆորմացիա՝ մի՛ փորձեք միանգամից անցնել վիրավորանքի, եթե նույնիսկ համաձայն չեք դիմացինի արտահայտած մտքի հետ: Ես հասկանում եմ, որ նման կոչեր շատ են, բայց եւ կարծում եմ, որ կգտնվեն մարդիկ, որոնք իմ կոչը կլսեն: Ինչու՞ ենք մենք դառնում մեկ մարդ, երբ արտաքին վտանգ է սպառնում, եւ ինչու՞ ենք իրար անխնա վիրավորում, երբ վտանգը թուլանում է: Համացանցում հայհոյանքը, կարծես, դարձել է պարտադիր պայման, բայց դա մեր ազգին չի՛ սազում, դա մեզ պե՛տք չէ, եւ ոչ մի հարց չի լուծվում այդ կեղտոտ արտահայտություններից:
Մենք պետք է հզորանանք, չէ՞ որ մենք դեռ շատ անելիքներ ունենք։
Փա՛ռք մեր հերոս եղբայրներին, փա՛ռք մեր հայրենիքին, փա՛ռք մեր հայ ժողովրդին»,-գրել է Արամեն: