«Ուխտագնացություն դեպի Բեթհովեն» փառատոնի շրջանակում դեկտեմբերին կկազմակերպվեն սիմֆոնիկ եւ կամերային համերգներ

Հայաստանի ազգային ֆիլհարմոնիկ նվագախմբի «Ուխտագնացություն դեպի Բեթհովեն» փառատոնի շրջանակում դեկտեմբերի ընթացքում կկայանա երկու սիմֆոնիկ եւ երկու կամերային համերգ։

Բեթհովենի ծննդյան օրը՝ դեկտեմբերի 16-ին, ժամը 19։00 Արամ Խաչատրյան համերգասրահում Հայաստանի ազգային ֆիլհարմոնիկ նվագախմբի կատարմամբ կհնչեն հանճարեղ կոմպոզիտորի թիվ 5 և թիվ 6 («Հովվերգական») սիմֆոնիաները։

Դեկտեմբերի 17-ին, ժամը 19։00 Արամ Խաչատրյան համերգասրահում ունկնդիրը հնարավորություն կունենա լսելու Բեթհովենի թիվ 1 եւ թիվ 4 սիմֆոնիաները։ Համերգները կղեկավարի գեղարվեստական ղեկավար եւ գլխավոր դիրիժոր Էդուարդ Թոփչյանը։ Նվագախումբը, պահպանելով հակահամաճարակային բոլոր կանոնները, այս ընթացքում ակտիվ փորձեր է իրականացրել եւ հավուր պատշաճի պատրաստվել բեթհովենյան հանճարեղ սիմֆոնիաների կատարմանը։

Բացի այդ, դեկտեմբերի ընթացքում կկազմակերպվեն կամերային համերգներ, որոնց ընթացքում հանդես կգան ՀԱՖՆ-ի մենակատարները։

Նվագախումբը դեկտեմբերին «Ուխտագնացություն դեպի Բեթհովեն» փառատոնի շրջանակում կձայնագրի եւ կտեսագրի հանճարեղ կոմպոզիտոր Լյուդվիգ վան Բեթհովենի առաջին հինգ սիմֆոնիաները։

Այս ընթացքում կպատրաստվի և կցուցադրվի Բեթհովենին նվիրված վավերագրական ֆիլմաշար:

«Ուխտագնացություն դեպի Բեթհովեն» փառատոնը կազմակերպում է Հայաստանի ազգային ֆիլհարմոնիկ նվագախումբը՝ ՀՀ կրթության, գիտության, մշակույթի եւ սպորտի նախարարության աջակցությամբ: Փառատոնը հարգանքի տուրք է մատուցում հանճարեղ կոմպոզիտորի ժառանգությանը, որը կերտվել էր խավարի դեմ իր հավերժական պայքարի համատեքստում: