Հինգ նշան, որ կյանքը ձեզ ավելի է ճնշում, քան կարծում եք

21:12   17 դեկտեմբերի, 2020

1. Ձեր կյանքում արմատականորեն փոխվել է քնի ռեժիմը

Սթրեսը յուրահատուկ է ազդում յուրաքանչյուրի վրա: Ոմանք կնախընտրեն ամբողջ օրը թավալ գալ անկողնում եւ հնարավորինս երկար քնել: Մյուսները, ընդհակառակը, սթրեսի պատճառով չեն կարողանում նորմալ քնել: Սակայն ցանկացած դեպքում չի կարելի նման քունը նորմալ համարել: Եթե դուք տառապում եք խրոնիկական անքնությամբ կամ էլ ամբողջ օրերով քնում եք, պետք է բժշկի դիմեք:

2. Ձեր առողջությունն արագ վատանում է

Եթե ձեր ծնոտը ցավում է նրանից, որ դուք սեղմում եք ատամները կամ կրճտացնում եք դրանք, եթե դուք մշտապես հիվանդ եք, եթե ձեզ տանջում է ցանը կամ քորը, եթե ձեզ մոտ ծայրաստիճան տագնապի կամ խուճապի նոպաներ են պատահում, այդ ամենը հավաստի նշաններ են, որ դուք մշտական սթրեսի մեջ եք: Այդ ախտանիշներից յուրաքանչյուրը կարող է նշանակալի հետեւանքներ ունենալ ամբողջ օրգանիզմի համար. ատամնաբույժին, բժշկին կամ մաշկաբանին կանոնավոր այցերը կօգնեն հաղթահարել դրանք, բայց չեն վերացնի սթրեսի նախապատճառը:

3. Օրգանիզմը ձեզ (ոչ նուրբ) ակնարկներ է ուղարկում

Սթրեսի վիճակում գտնվող մարդը կսկսի տհաճ (բայց ոչ ծանր) սթրեսային ազդակներ զգալ: Թույլ, բայց կայուն գլխացավերը, վզի մկանների ամենօրա լարվածությունը եւ/կամ հաճախակի սրտխառնոցի նոպաները ի հայտ են գալիս ասես ոչ մի տեղից: Իրականում այդ բոլոր դրսեւորումները սովորաբար կապված են անմիջական սթրեսորի հետ: Եթե դուք ձեզ ֆիզիկապես վատ եք զգում աշխատանքի գնալիս, եթե դուք ամեն օր ասպիրին եք ընդունում, որ մինչեւ երեկո ապրեք, կամ եթե օրվա վերջին պարանոցում եւ ուսերում ցավեր եք զգում, այդ ամենը կոնկրետ պատճառ է մատնանշում: Եթե ժամանակին միջոցներ ձեռք չառնվեն, այդ նշանները կարող են վերածվել առողջության լուրջ խնդիրների, որոնք բժշկական միջամտություն են պահանջում:

4. Դուք կորցրել եք հետաքրքրությունը սիրելի զբաղմունքի հանդեպ

Ոչ զուգընկերոջ հետ շփումը, ոչ մարզասրահ այցելությունը, որ սիրելի սերիալի դիտումը նախկին ուրախությունը չեն բերում: Դուք գուցե նույնիսկ սկսեք քննադատել սեփական հակումները կամ պահանջներ ներկայացնեք նրան, ինչը նախկինում ձեզ դուր էր գալիս: Թվում է, թե ոչինչ ի վիճակի չէ բավարարել լիցքաթափվելու եւ հաճույք ստանալու ձեր պահանջմունքը: Այդ պատճառով դուք ընդհանրապես ոչինչ չեք ուզում անել: Այս կողմնակի հետեւանքը, ինչպես եւ այդ ցուցակի մնացած բոլոր կետերը, վկայում է, որ խնդիրը խորքում է եւ շտապ միջամտություն է պահանջում:

5. Դուք դադարում եք հոգ տանել ձեր արտաքինին

Խոսքն այն մասին չէ, որ մի օր առանց դիմահարդարման շրջեք եւ ժամանակ առ ժամանակ ոչ նորաձեւ, բայց հարմարավետ հագուստ կրեք. դա նորմալ է, իսկ այ` ցնցուղ չընդունելը եւ ինքն իր նկատմամբ նվազագույն հարգանք չզգալը արդեն նշանակում է, որ խնդիր կա:


Աղբյուրը` Woman.ru



© NEWS.am STYLE