Համացանցում հայտնվել է Օփրա Ուինֆրիին տված Մեգան Մարքլի եւ արքայազն Հարիի հարցազրույցի թիզերը

Մարտի 7-ին CBS ալիքում կթողարկվի  39-ամյա Մեգան Մարքլի եւ 36-ամյա արքայազն Հարիի Օփրա Ուինֆրիին տված մեծ հարցազրույցը: Դրա շուրջ իրարանցումն արդեն հսկայական է, քանզի սպասվում է, որ ամուսինները կպատմեն թագավորական ընտանիքի ավագ անդամների պաշտոններից իրենց հեռանալու պատճառների մասին, կփոխանցեն տեղափոխվելուց հետո կյանքի մանրամասները եւ կխոսեն անձնական կյանքի մասին: Այսօր համացանցում հայտնվել է հարցազրույցի թիզերը, որտեղ հաղորդավարուհին եւս մեկ անգամ հաստատել է, որ իրենք խոսելու են ամենատարբեր թեմաներով:

«Ես պարզապես ուզում եմ պարզություն մտցնել: Չկա այնպիսի թեմա, որն արգելքի տակ է», - ասում է հեռուստահաղորդավարուհին:

Հարցազրույցի համար դքսուհին, որն այժմ սպասում է երկրորդ զավակի ծնունդին, ընտրել է Ջորջիո Արմանի ապրանքանիշի մետաքսե սեւ զգեստ, Aquazzura-ի կոշիկներ, Pippa Small-ի վզնոց, Birks ականջօղեր եւ Cartier թեւնոց։

Զրույցի ընթացքում Մեգանը պարբերաբար ձեռը դնում էր որովայնին, ինչը նա հաճախ էր անում առաջին հղիության ընթացքում:

Օփրայի ինտրիգային հարցից մի փոքր հատված է ներառվել, որի պատասխանը դեռ չեն հայտնել։

«Դու լռել ես, թե քեզ ստիպել են լռել»,- հարցրել է նա Մեգանին։

Հարցազրույցի ավարտին Ուինֆրին նշել է, որ զույգի որոշ արտահայտություններ բավական ցնցող էին։ Ըստ լուրերի՝ բրիտանական թագավորական ընտանիքի անդամները բավական դժգոհ են, որ ամուսինները որոշել են հրապարակավ քննարկել անձնական թեմաները։

Աղբյուրը՝ Сплетник