Ֆրանսիացի հասարակական եւ քաղաքական գործիչները Ֆրանսիային կոչ են անում օգտագործել իրավասությունը հայ գերիների ազատ արձակման համար

18:32   15 մարտի, 2021

Ֆրանսիական «Le Point» պարբերականի հաղորդմամբ՝ ֆրանսիական հանրային եւ քաղաքական գործիչները Մինսկի խմբի համանախագահ Ֆրանսիային կոչ են արել օգտագործել իր ողջ իրավասությունը հայ ռազմագերիների ազատ արձակման համար։ 2020թ․-ի նոյեմբերի 9-ին Հայաստանի, Ադրբեջանի, Ռուսաստանի միջեւ ստորագրված հայտարարությունից ամիսներ անց Բաքուն հրաժարվում է հումանիտար հիմնական դրույթներից մեկը՝ ռազմագերիների ազատ արձակումը։ 

Նրանց խոսքով՝ ստորագրված փաստաթղթի նկատմամբ այս անհարգալից վերաբերմունքը փշրում է հայ ժողովրդի նորմալ կյանքին վերադառնալու հույսը նախնիների հողերում `1915թ․-ի  ցեղասպանությունից հարյուր տարի անց: Դա կարող է մեկնաբանվել միայն որպես ատելության լրացուցիչ դրսեւորում հայերի նկատմամբ, նշել են նրանք։

Գործիչները նշել են, որ ադրբեջանական կողմը ռազմական հանցագործություններ է իրականացրել հայերի նկատմամբ, ընդ որում, ինչպես հայ զինվորների, այնպես էլ քաղաքացիական անձանց նկատմամբ, ժողովրդավարության, մարդու իրավունքների եւ ազատությունների վատագույն ցուցանիշներն ունի աշխարհում՝ արձանագրված իրապաշտպան կազմակերպությունների կողմից։

«Եթե ԵԱՀԿ կողմից մանդատ ստանձնած այս խումբը չի կարողացել կանխել պատերազմը կամ պաշտպանել զոհերին, ապա գոնե թող ապահովի հրադադարի ռեժիմի այս հումանիտար կետի պահպանումը»,- ասվում է ֆրանսիացի մտավորականների ստորագրած հայտարարության մեջ:



© NEWS.am STYLE