Երեւանում կհնչի Դմիտրի Շոստակովիչի թիվ 10 սիմֆոնիան
17:01 16 մարտի, 2021Հայաստանի պետական սիմֆոնիկ նվագախումբը մարտի 23-ին հրավիրում է ունկնդրելու Դմիտրի Շոստակովիչի թիվ 10 սիմֆոնիան։ 20-րդ դարի խոշորագույն կոմպոզիտոր Դմիտրի Շոստակովիչի 10-րդ սիմֆոնիան հեղինակի ամենահայտնի գործերից մեկն է։ Չորս մասից բաղկացած սիմֆոնիան առաջին անգամ կատարվել է Լենինգրադի ֆիլհարմոնիկ նվագախմբի կողմից 1953 թվականի դեկտեմբերի 17-ին։
Հեղինակը 10-րդ սիմֆոնիան գրել է երկարամյա դադարից հետո։ Իր նախորդ՝ 9-րդ սիմֆոնիան նա գրել էր ութ տարի առաջ։ Եվ այդ լռությունը Շոստակովիչին պարտադրված էր. նրա բարդ հարաբերությունները խորհրդային ղեկավարության հետ անդրադառնում էին նաև կոմպոզիտորի ստեղծագործական կյանքի վրա։ Շոստակովիչը մեղադրվում էր ֆորմալիզմի մեջ, նրա շատ գործեր արգելում էին կատարել։ Եվ այդ ութամյա լռության արդյունքը տասներորդ սիմֆոնիան էր՝ հեղինակի ամենաբարդ ու խորապես անձնական ստեղծագործությունը, որը սպասված էր և ունկնդիրների ու քննադատների շրջանում արժանացավ հավանության։
Այս առեղծվածային ու շատ գեղեցիկ ստեղծագործության` Հայաստանի պետական սիմֆոնիկ նվագախմբի մեկնաբանությունը կարող եք վայելել մարտի 23-ին՝ ժամը 19.30, Արամ Խաչատրյան համերգասրահում։ Համերգը կղեկավարի նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը։