Հայտնի պարֆյումեր Ֆրանսիս Քյուրքջյանը երեք նոր օծանելիք է ներկայացրել

Հայտնի պարֆյումեր Ֆրանսիս Քյուրքջյանը ներկայացրել է երեք բույրից բաղկացած հավաքածուն, որը ոգեշնչված է լույսից, հայտնում է Wallpaper-ը։ Հավաքածուի բույրերը գենդերային առումով չեզոք են։

«Cologne Forte» բույրերի նոր հավաքածուն «Aqua»-ի շարունակությունն է եւ առաջարկում է երեք նոր տարբերակ՝ «Aqua Celestia Cologne Forte», «Aqua Universalis Cologne Forte» եւ «Aqua Vitae Cologne Forte»։

«Aqua Celestia Cologne Forte» բույրը փոխանցում է բերգամոտի, հաղարջի բողբոջների, հասմիկի, պատկառուկի, մրգերի եւ մուշկի նոտաներ։ «Aqua Universalis Cologne Forte»-ն համադրում է վարդի, բերգամոտի եւ հոտավետ ոլոռի բույրեր։ «Aqua Vitae Cologne Forte» օծելիքում համադրված են ցիտրուսային, սանդալի եւ մուշկի նոտաներ։

«Ես ցանկանում էի վերամիավորվել անուշահոտ ջրի ավանդույթի հետ, որն իր սկզբանակ ձեւով պիտանի էր խմելու համար՝ ստեղծելով «ներքուստ-արտաքուստ» էֆեկտը»,- ասում է Ֆրանսիս Քյուրքւյանը։

Բույրերը ներկայացված են դեղին, կապույտ եւ սպիտակ գույների տուփերով։ Օծանելիքը վաճառքում կհայտնվի մայիսի մեկին։