Էմոցիաներ, արցունքներ ու անկեղծ հուզմունք. «Արցախի ձայներ» խմբի բարեգործական համերգն ու հատուկ հյուրերը

Երեկ` մայիսի 5-ին, Կ. Դեմիրճյանի անվան մարզահամերգային համալիրում կայացավ «Արցախի ձայներ» խմբի բարեգործական համերգը, որին մասնակցեցին նաեւ Շուշան Պետրոսյանը, Արթուր Գրիգորյանը, Միքայել Ոսկանյան Տրիոն, Գոռ Սուջյանը, Սեւակ Խանաղյանը, Դավիթ Ամալյանը, Անետ Աղաբեկյանը եւ այլք։ Համերգի ողջ հասույթն ուղղվելու է պատերազմում վիրավորում ստացած զինվորներին, որոնք վերականգնողական բուժում են ստանում Հայաստանում:

Երեկվա երեկոն էմոցիոնալ էր, ինչպես խմբի ու կատարողների, այնպես էլ` հանդիսատեսի համար, քանի որ երգերի կիզակետում Արցախն էր, որի մասին երգելը, ըստ «Արցախի ձայներ» նախագծի գեղարվեստական ղեկավար Լիրա Քոչարյանի, այսօր ծանր է. «Ամենադժվար պահը երգերի ընտրությունն էր, քանի որ մեր երգերը, կարծես, արժեզրկվել են... Մեզ պետք են նոր երգեր, պետք է առաջին հերթին հասկանանք` ինչի մասին է պետք երգել, բայց մենք համաձայնվեցինք այս համերգին, որ հասկանանք մարդկանց տրամադրությունը, ուզում եմ հասկանալ` ինչ է պահանջվում: Ստեփանակերտում տրամադրությունն այլ է, Սյունիքում` մեկ այլ, իսկ Երեւանում, կարծես, կարելի է կազմել հավաքական կարծիք»,- նշեց նա` խոստովանելով.

«Շատ երկար ժամանակ չէինք համաձայնվում ոչ մի համերգի, բայց արդեն զգում ենք, որ հանդիսատեսը կարոտում է մեզ, միգուցե` ոչ այնքան մեզ, այլ Արցախը, իսկ մեզ՝ որպես այդ ամենի խորհրդանիշ: Արտիստների համար շատ դժվար է բեմ բարձրանալը, առաջին փորձերն էին շատ դժվար: Բացի այն, որ ես ղեկավար եմ, նաեւ դարձել եմ խմբի համար հոգեբան: Մեր բեմադրիչներից մեկն, օրինակ, որին զանգահարել էի փորձի ժամանակ, չէր կարողանում խոսել. պարզվում է` իր զոհված ընկերոջն էին գտել, բերել...»:

Լիրա Քոչարյանը, սակայն, փորձում է լավատեսությամբ մոտենալ խմբի ապագային: Չնայած դժվարություններին` թե հոգեբանական, թե ֆինանսական, խմբի պատանի կատարողները հույս են արթնացնում, որ «Արցախի ձայները» պետք է ուժ գտնի ստեղծագործելու եւ Հայաստանն ու Արցախը պատվով ներկայացնելու միջազգային հարթակներում:

Սյունե Առաքելյան