Լայն ջինսեր, հարմարավետ տոպեր, թափանցիկ զգեստներ ու շեշտված ուսեր. 2021-ի թրենդները՝ հայտնիների զգեստապահարանից (ֆոտո)

Եղանակը դեռ, մեղմ ասած, արեւոտ չէ, բայց դա չի խանգարում մեզ, որ սկսենք թարմացնել մեր ամառային զգեստապահարանները, իսկ դրանք այս տարի, առավել, քան երբեւէ, դեպի հարմարավետեւթյուն են տանում:

NEWS.am STYLE-ը 2021-ի ամառային թրենդները ներկայացնում է հայտնիների զգեստապահարաններից վերցրած օրինակներով:

Անխոս, 2021-ի ամենասիրված թրենդը դարձել են լայն ջինսերը, որոնք, ի դեպ, շատ նորաձեւ էին նաեւ 90-ականներին, ինչը կրկին ապացուցում է, որ նորաձեւությունը հեռանում է՝ նորովի վերադառնալու նպատակով:

Եթե ձմռանն ու գարնանը այդպիսի տաբատները հարմար ու գեղեցիկ էր համադրել երկարավիզ նեղ շապիկների հետ, ապա ամռանը դրանք իդեալական կնայվեն տոպերի համադրությամբ: Առհասարակ, երկար գոտիով ջինսերն ու տոպերն այս ամռան ամենապրակտիկ ու նորաձեւ ընտրությունն են:

Լայն ջինսերը կարելի է համադրել սպորտային կամ դասական ոճի կոշիկների հետ, ինչը դրանք դարձնում է հարմար նախընտրություն ոչ միայն առօրյա, այլեւ՝ երեկոյան look-երի համար:

Նկատած կլինեք, որ գարունը սկսվել է շեշտված ուսերով վերնաշապիկներով ու բլուզներով, կամ՝ դրանց՝ բաց ուսերով տարբերակներով, որոնք համադրվում են գեղեցիկ դեկոլտեով:

Չափազանց թրենդային են նաեւ նմանօրինակ ուսերով զգեստները՝ սպիտակ կամ ծաղկային երանգներով:

Ծաղկավոր պրինտն, առհասարակ, ամառն ազդարարող ամենաթրենդային դետալներից է: Չենք մոռանում նաեւ զոլավոր ու պուտավոր զգեստների մասին, որոնք կարելի է ամբողջացնել ինչպես սպորտային, այնպես էլ՝ դասական կոշիկներով:

Այս տարի շատ նորաձեւ են նաեւ հետաքրքիր կտրվածք ունեցող միդի շրջազգեստները, որոնք կարելի է համադրել տոպերի եւ վերնաշապիկների հետ:

Իսկ կարճ ու կլոր շրջազգեստները բավական թրենդային են նայվում երկար վերնաշապիկների համադրությամբ:

Ի դեպ, 2021-ի թրենդներից են նաեւ թափանցիկ կտորով կարված զգեստները, որոնք ե՛ւ նուրբ են, ե՛ւ կանացի:

Դե, չպետք է մոռանալ, որ տարվա գույներն են դեղինն ու մոխրագույնը, բայց չենք անտեսում նաեւ վառ ամառային երանգներն ու հետաքրքիր պրինտները: