Դիբրովը խոստովանել է, որ իրեն կաշառք են առաջարկել «Ո՞վ է ուզում դառնալ միլիոնատեր» հաղորդման ժամանակ
23:37 12 մայիսի, 2021Լրագրող եւ հեռուստահաղորդավար Դմիտրի Դիբրովը պատմել է, որ իրեն մեկ անգամ չէ, որ կաշառք են առաջարկել «Ո՞վ է ուզում դառնալ միլիոնատեր» շոուի ժամանակ։
Դիբրովը հյուրընկալվել է Իվան Ուրգանտի «Вечерний Ургант» շոուին։ Հաղորդման հեղինակները «Ո՞վ է ուզում դառնալ միլիոնատեր» ծրագրի համար նոր կատակային հուշումներ են հորինել, եւ Ուրգանտը խնդրել է հյուրին լուսանկարների միջոցով կռահել դրանց անվանումները։ Նկարներից մեկի վրա պատկերված է եղել թղթադրամներով ձեռք։
«Դա կաշառք է հաղորդավարին։ Իսկ դուք չեք էլ պատկերացնում, թե 20 տարվա ընթացքում քանի անգամ եմ ստիպված եղել նման բան տեսնել», - խոստովանել է Դիբրովը:
Հաղորդավարը պնդում է, որ իրեն կաշառելու բոլոր փորձերին պատասխանել է մերժումով։ Դիբրովի խոսքով՝ ինքը հանդես է գալիս իսկական էրուդիտների հաղթանակի օգտին։
Հաղորդավարի հետ զրույցի ժամանակ Ուրգանտը հիշեցրել է «Ինչ, Որտեղ, Երբ»-ի մագիստր Ալեքսանդր Դրուզի հետ սկանդալի մասին։ Նրան մեղադրում էին «Ո՞վ է ուզում դառնալ միլիոնատեր» հաղորդման խմբագիրներից մեկին՝ ճիշտ պատասխանների համար կաշառելու փորձի մեջ։ Դրուզը հերքել է մեղքը, սակայն նրան երկար ժամանակ հեռացրել են «Ինչ, որտեղ, երբ» խաղից։