Միխայիլ Գալուստյանն օրերս Սուպեր Ժորիկ նախագծի շրջանակում ներկայացրեց իր նոր՝ «Меня прет от тебя» տեսահոլովակը: Ռուսական շոու-բիզնեսի ամենահայտնի հումորիստներից մեկն իր նոր աշխատանքի շրջանակում համագործակցել է հայկական թիմի հետ: Տեսահոլովակի ռեժիսորը Գրիգոր Գասպարյանն է, օպերատորը՝ Սուրեն Թադեւոսյանը, հերոսուհիներից մեկը՝ Մարիա Մաթեւոսյանը՝ Մաշա Մատվեեւեան, իսկ ոճաբանը՝ Արայիկ Գաբաջյանը:
Սա Սուպեր Ժորիկի երրորդ տեսահոլովակն է, որի շուրջ Միշա Գալուստյանը համագործակցում է պրոդյուսեր Սոֆիա Ղուլյանի հետ: Վերջինը NEWS.am STYLE-ին է տրամադրել չհրապարակված լուսանկարներ տեսահոլովակի բեքսթեյջից ու պատմել Գալուստյանի հետ իր հերթական աշխատանքի մասին:
«Իսկապես, սա արդեն իմ երրորդ համագործակցությունն է Սուպեր Ժորիկի հետ: Նախորդ նկարահանումները եւս տեղի էին ունեցել Սոչիում, բայց այս անգամ եղանակը որոշել էր դժվարեցնել մեր գործը, ինչն անհանգստություն էր ստեղծել բոլորիս՝ ռեժիսոր Գրիգոր Գասպարյանի, օպերատոր Սուրեն Թադեւոսյանի ու դերասանուհիներ Աննան Բուզովայի ու Մարիա Մատվեեւայի համար»,-պատմեց Սոֆիան՝ հավելելով, որ տեսահոլովակում Մաշա Մատվեեւայի թեկնածությունն առաջարկել է Գարիկ Մարտիրոսյանը: «Քանի որ Մաշան իդեալական համապատասխանում էր այդ դերին, իսկ Գարիկը համառորեն պնդում էր հենց նրան ընտրել, նրա մասնակցության վերաբերյալ հարցը միաձայն ընդունվեց»:
Անդրադառնալով խոսակցություններին, թե Միշա Գալուստյանի հետ աշխատելը բարդ է, ու պատասխանելով, թե ինչպես է նրա հետ կարողանում հեշտ «լեզու գտնել»՝ Սոֆիան ժպիտով նշեց.
«Ես նրան, պարզապես, շատ եմ սիրում ու միշտ համաձայնվում եմ նրա հետ»:
Ինչ վերաբերում է Սուպեր Ժորիկի՝ Երեւանում հնարավոր ելույթներին՝ պրոդյուսերը նշեց.
«Իհարկե, կան առաջարկներ ու նման ծրագրեր, բայց մենք փորձում ենք ամեն ինչ գրագետ ձեւով կազմակերպել՝ հաշվի առնելով Միշա Գալուստյանի չափազանց խիտ գրաֆիկը»:
Սյունե Առաքելյան
Լուսանկարները՝ Վլադիմիր Խարիտոնովի