Երգիչ Արմոն ամուսնացավ բոլորովին վերջերս: Ի զարման բոլորին նա եւ իր երկրորդ կեսը՝ Անին նախընտրեցին հարսանիքը բոլորից հեռու անել` Դուբայում: Մանրամասների մասին NEWS.am STYLE-ը զրուցեց հենց երգչի հետ:
Արմո, ինչու՞ որոշեցիք միայն բոլորից հեռու նշել այդ օրը:
Չենք սիրում անիմաստ ճոխություններ եւ ցուցամոլություններ, այդ պատճառով որոշեցինք մեկներ Դուբայ եւ այնտեղ նշել մեր հարսանիքը:
Հյուրեր կա՞յին:
Այո, իրենց ցանկությամբ: Արամ Նիկոլյանը իր ընտանիքով, Արամայիս Հայրապետյանը իր կնոջ հետ: Նաեւ մեր արաբ եղբայրներից ոմանք:
Ինչո՞ւ Դուբայում:
Պարզապես այդպես ստացվեց: Ես եւ կինս երբեք այդ երկրում չէինք եղել:
Ինչպե՞ս եղավ ամեն ի՞նչ:
Աստված ուղարկեց Անիիս, հետո խելագարի նման սկսեցինք սիրել իրար: Հետո, երբ ավելի շատ գժվեցինք իրար համար, որոշեցինք Աստծո կամքով լինել մեկ՝ ամուսնանալ եւ ապրել միասին: Եւ Աստծո միացրածը երբեք մարդը չի կարող բաժանել:
Երբ փոքր էիք, ինչպիսի՞ հարսանիքի մասին էիք երազում: Եթե, իհարկե, տղաները այդ օրվա մասին երազում են...
Ես հարսանիքի արարողությունները չեմ սիրում: Այնքան են նույն բաներն անում, որ հյուրերն արդեն գիտեն, թե ինչից հետո ինչ պիտի լինի: Մենք չարեցինք հարսանիք պարզապես անելու կամ ցուցադրելու համար, արեցինք մեզ համար:
Ձեր երկրորդ կեսին ինչպե՞ս եք հանդիպել:
Ժպիտը դեմքիս: Նա տիեզերքի միակն էակն է, ում սիրում եմ խելագարի նման: Եւ կարող եմ վստահ ասել, որ դա փոխադարձ է:
Իսկ Ձեր համատեղ հետագա կյանքն ինչպե՞ս եք պատկերացնում:
Ամենակարեւորը՝ Աստծո հետ, քանի որ երբ իրոք ապրում ես իսկական քրիստոնյայի կյանքով եւ Աստծո ներկայությամբ, վայելում ես Աստծո բերած սերը: Եւ ընտանիքում նույնպես տիրում է այդ սերը: Խոնարհությունը, ներողամտությունը, բարիությունը, հասկացողությունը: Կցանկանայի, որ բոլորի ընտանիքներում այդպես լիներ:
Բալիկների մասին մտածու՞մ եք:
Առաջին իսկ օրվանից: Նախատեսել ենք 12 երեխա ունենալ:
Իսկ ստեղծագործական կյանքը ո՞ր փուլում է:
Ինչպես առաջ, այնպես էլ հիմա, ստեղծագործում եւ ստեղծագործում եմ: Իսկ մի քանի օրից կլինի նոր տեսահոլովակ «Արի գնանք» երգի հիման վրա:
Դուք Ձեզ այժմ երջանի՞կ եք համարում:
Ես իմ կյանքում այսքան երջանիկ երբեք չեմ եղել: Նախ վայելում եմ Աստծո սերը, ապա իմ սիրելի կնոջ խոնարհությունը, հեզությունը, հնազանդությունը եւ սերը: