EXCLUSIVE. Սցենարիստ Լեւոն Խաչատրյանը՝ Գոռ Վարդանյանի նոր ֆիլմի գաղտնիքների ու մանրամասների մասին

21:18   22 հոկտեմբերի, 2013

Մասնագիտությամբ իրավաբան եւ երկար տարիներ ոստիկանության համակարգի ծանր պատասխանատվությունն իր ուսերին կրող Լեւոն Խաչատրյանը դեռեւս տարիներ առաջ էր հետաքրքրվում ֆիլմարտադրությամբ, հատկապես սցենարային աշխատանքով: Եվ այսօր իր հոբբիին լրջության շունչ տալով՝ նա իրականացրեց հեղինակային երրորդ ֆիլմի սցենարը:

NEWS.am STYLE-ը ներկայացնում է արդեն իսկ սպասված եւ մեծ աղմուկ հանած  ֆիլմի, Լեւոն Խաչատրյանի եւ Գոռ Վարդանյանի փոխհարաբերությունների, ԱՄՆ-ում նրանց մութ գործերի մասին լուրերի իսկությունը պարզաբանելող բացառիկ հարցազրույց: Ինչպե՞ս միտք հղացավ զբաղվել այդ պատասխանատու գործով, ի՞նչը նրան ստիպեց լրջորեն մտածել այդ ոլորտում ձեռագիր թողնելու մասին եւ ինչպե՞ս զարգացան նրա հարաբերությունները ֆիլմ ստեղծողների հետ: Այս ամենի մասին զրույցում մանրամասնեց Լեւոն Խաչատրյանը:

 

Բազմիցս նշել եք, որ ավարտել եք Ոստիկանության Ակադեմիան, երկար տարիներ աշխատել եք քրեակատարողական հիմնարկներում, այնուհետեւ ոստիկանությունում` ընդհուպ մինչեւ «Թմրաբիզնեսի դեմ պայքարի վարչության» պետ: Որքանո՞վ է Ձեր անցած ուղին նպաստել ֆիլմի սցենարներ գրելուն եւ Ձեզ հետագայում նույնպես տեսնո՞ւմ եք այդ ասպարեզում:

Այո, ավարտել եմ Ոստիկանության ակադեմիան եւ ստացել եմ իրավաբան-իրավագետի որակավորում: Աշխատել եմ քրեակատարողական վարչությունում` որպես օպեր-լիազոր, 2004 թվականին տեղափոխվել եմ ՀՀ Ոստիկանություն եւ մինչեւ 2012թ. զբաղեցրել «Թմրաբիզնեսի դեմ պայքարի վարչության» պետի պաշտոնը: Օպերատիվ աշխատանքը բավական հետաքրքիր, բարդ եւ ստեղծարար է, եւ յուրաքանչյուր օպերատիվ աշխատող արդեն իսկ սցենարիստ է. պետք է միայն կարողանալ համակարգել մտքերը եւ համապատասխանեցնել ֆիլմ արտադրողի պահանջներին: Չեմ հերքում, որ իմ անցած ճանապարհը բավական մեծ ազդեցություն է ունեցել սցենարներ գրելու որոշման վրա եւ կարծես թե անավարտ մնացած գործերի ասելիքը տրվել է ֆիլմերի սցենարային լուծումներով: Գուցե թմրաբիզնեսի դեմ պայքարի ընթացքում ականատես լինելով բազմաթիվ ողբերգական եւ մեր ազգային գենոֆոնդի համար կործանարար ազդեցություն ունեցող երեւույթների, չբավարարվելով միայն այն գործառույթներով, որոնք ես ունեի, փորձել եմ սցենարով ցույց տալ դրա վատ ազդեցությունն ու հետեւանքները եւ սթափեցնել, ինչ-որ իմաստով նաեւ հասարակության ուշադրությունը հրավիրել խնդրի լրջության վրա: Ֆիլմն ինձ հնարավորություն ընձեռեց ազատ արտահայտել իմ անհանգստություններն արծարծվող բազմաթիվ երեւույթների նկատմամբ, իհարկե, թույլատրելիի սահմաններում:

Չնայած մասնագիտությամբ իրավաբան եմ, բայց հոբբին, որը հիմա հասունանում ու իր արմատներն է տարածում իմ մեջ, սկսել է լրջորոն հետաքրքրել ինձ: Վստահ եմ՝ հետագայում էլ հանդես կգամ նորանոր ծրագրերով եւ այն հսկայական տեղեկատվությունը, որ կուտակվել է այս տարիների ընթացքում, կարծում եմ՝ կվերածվի գեղարվեստական ֆիլմերի:

«Ստվերները դրախտում»-ը ո՞րերորդ ֆիլմն է, որ ստեղծվում է Գոռ Վարդանյանի հետ համագործակցության շրջանակում:

Այն Գոռ Վարդանյանի հետ համատեղ երրորդ ֆիլմն է: Առաջինը բոլորին քաջ հայտնի «Վրիժառու»-ն է, իսկ երկրորդը՝ «Revenger 2»-ը: Շուտով հանդիսատեսի դատին կհանձնենք նաեւ երրորդ՝ «Ստվերները դրախտում» ֆիլմը, որի նկարահանումներն անցկացվել են Լոս Անջելոսում եւ Ֆրանսիայում: Համագործակցությունը եղել է Գոռ Վարդանյանի առաջարկությամբ:

Երբ պատրաստվում էր նկարահանել «Վրիժառու» ֆիլմը, մի քանի սցենարիստների հետ խորհրդակցելուց հետո այդ պատասխանատու գործը վստահեց ինձ, եւ այդպես իրականացավ մեր առաջին համատեղ գաղափարը: Իհարկե, Գոռ Վարդանյանն այդ շրջանում ինձ բավական օգնեց՝ փոխանցելով  նաեւ սցենար գրելու եւ ֆիլմ նկարահանելու իր մեծ փորձը, քանի որ դա ինձ համար նոր ոլորտ էր: Արդյունքում ունեցանք իմ առաջին՝  «Վրիժառու» ֆիլմի սցենարը:

«Վրիժառու» եւ «Revenger 2»  ֆիլմերը բավական մեծ աղմուկ առաջացրեցին հանրության շրջանում: Այդ աղմուկի պատճառը հանցավոր եւ, շատերի համոզմամբ, ոչ այդքան իրականությունը պատկերող իրավիճակն էր: Արդյո՞ք նոր ֆիլմը եւս սցենարային լուծումներով նման չի լինի նախորդ երկու ֆիլմերին:

Գիտեք, ասում են` հաճախ ճշմարտությունն ասելու պատճառն այն թաքցնելու անհնարինության մեջ է: Եվ այն, որ ֆիլմերը մեծ աղմուկ են հանել եւ մեծ արձագանք են գտել, միայն ողջունելի փաստ է: Կարելի է նույնիսկ ասել, որ մեր ասելիքը հասցրել ենք տեղ, ինչի համար նույնպես ուրախ եմ, քանի որ եթե այդ ֆիլմը դիտելու արդյունքում գոնե մեկ երիտասարդի ծնողներ ուշադրություն դարձնեն իրենց երեխայի կենսակերպին եւ վարքագծին, կամ գոնե մեկ հոգի որոշի հետ կանգնել սխալ ուղուց, կարող ենք հաղթանակ արձանագրել… Բացի այդ, ֆիլմը վերաբերում էր պետական պաշտոնյաներին, ԱԺ պատգամավորի, քրեական աշխարհի անձանց, բնական է, որ աղմուկ պետք է բարձրացներ: Իսկ նոր ֆիլմը նման չի լինի նախորդներին…

Հե՞շտ է աշխատել Գոռ Վարդանյանի հետ: Ֆեյսբուքյան նկարներից երեւում է, որ մտերիմ եք: Ի՞նչով է պայմանավորված Ձեր մտերմությունը:

Գոռ Վարդանյանին ճանաչում եմ 1994 թվականից, երբ սկսեցի հաճախել Ֆուլ Կոնտակտ կարատեի մարզումների: Ասեմ, որ նա մինչ օրս էլ իմ ուսուցիչն է: 2000թ.-ից Ֆուլ Կոնտակտ կարատեի Ֆեդերացիայի փոխնախագահն եմ, այնուհետեւ՝ գլխավոր մրցավարը, սեւ գոտի 4-րդ կարգ ունեմ: Ինչ վերաբերում է այլ կապերին. Գոռ Վարդանյանն իմ ընտանիքի կնքահայրն է: Փորձեմ մի փոքր փակագծերը բացել. նա իմ մկրտության, պսակադրության եւ երեխաներիս կնքահայրն է, եւ ես հպարտ եմ դրանով: Ցավալի է, սակայն մեր իրականության մեջ կան մարդիկ, ովքեր ծրագրված երեխա են լույս աշխարհ բերում՝ այսինչի հետ նոր «սուրբ» կապ հաստատելու համար:

Իսկ նրա հետ աշխատելն ինձ համար շատ հեշտ է եւ հաճելի, որովհետեւ ես հասկանում եմ այն ամենը, ինչ ինքն ուզում է տեսնել եւ ստանալ, նույնիսկ կարող եմ ասել, որ մենք երկուսով նույն սկզբունքներն ու դիրքորոշումն ունենք:

Գոռ Վարդանյանի բոլոր ֆիլմերը դաստիարակչական նպատակ են ունեցել, որտեղ պայքար է մղվում բացասական երեւույթների եւ չարի դեմ: Բայց լուրեր են պտտվում, որ նա հովանավորում է գաղտնի քրեական խմբերի եւ որ ԱՄՆ-ում անօրինական գործունեությամբ է զբաղվում:

Ես դա անհեթեթություն եմ համարում: Գոռ Վարդանյանը այդ ամենի հետ ոչ մի կապ չի կարող ունենալ մի պարզ պատճառով. նա սպա է եւ շատ երկար տարիներ աշխատել է Ոստիկանության, Ազգային Անվտանգության համակարգում, եղել է Հայաստանի առաջին եւ երկրորդ նախագահների անվտանգության ծառայության աշխատակից, հիմնադրել է աշխարհում տեղ ու դիրք ունեցող սպորտային կայուն կազմակերպություն՝ Դուքենդո Ֆուլ Կոնտակտ կարատեի Ֆեդերացիան, բազմաթիվ սաներ ունի, որոնցից շատերն աշխատում են իրավապահ տարբեր համակարգերում, նրա գործունեությունը բավական թափանցիկ է:

Գոռ Վարդանյանի վերջին հարցազրույցից պարզ դարձավ, որ այս ֆիլմը նվիրված է վերջին 20-25 տարիներին ԱՄՆ-ում բնակություն հաստատած քրեական տարերին: Ի՞նչ կասեք այս մասին:

Այո, ֆիլմը նվիրված է վերջին 20-25 տարիներին ԱՄՆ-ում բնակություն հաստատած Էմիգրանտներին, ոչ միայն հայ, այլեւ աշխարհի տարբեր անկյուններից Լոս Անջելես փոխադրված եւ բնակություն հաստատած մարդկանց: Չեմ ցանկանում հիմա բացել փակագծերը, պատմել ֆիլմի սյուժեն, բայց համոզված եմ, որ նկարահանել ենք հոլիվուդյան չափանիշներով ֆիլմ եւ համարձակություն ենք ունեցել ձեռնոց նետել բոլորի համար անհասանելի Հոլիվուդին: Մեր թիմը համոզված է, որ աշխատանքով ամեն ինչի կարելի է հասնել:

Եվ վերադառնալով Ձեր մասնագիտական պարտականություններին՝ ուզում եմ հնչեցնել վերջին հարցը: Լուրեր են պտտվում, որ ոստիկանական համակարգում Ձեր բացակայությունը մեծ ուրախություն է առաջացրել քրեական որոշ խմբավորումների շրջանում:

Ճիշտ ասած, ես նման տեղեկություն չունեմ, բայց եթե համապատասխանում է իրականությանը, ես այդ փաստից կարող եմ միայն ուրախանալ, քանի որ կհամարեմ իմ ծառայության տարիները հիմնավոր ու տեղին: Ես դա համարում եմ իմ աշխատանքի պատասխանը: Եթե քրեական խմբավորումներն ուրախացել են իմ բացակայության համար, դրանից լավ գնահատական իմ աշխատանքին չեմ պատկերացնում:

Զրուցեց Մարինա Ադուլյանը



© NEWS.am STYLE