Նինա Սարկիսյանցի հարսանեկան զգեստների ցուցադրությունը Ռուսաստանում եւ միջոցառման հայտնի հյուրերը (ֆոտո)
12:08 20 դեկտեմբերի, 2021Նինա Սարկիսյանցը, որը հայտնի է իր շքեղ հարսանեկան զգեստներով, օրերս ցուցադրություն է ունեցել Վորոնեժում, որին մասնակցել են ինչպես հայ, այնպես էլ այլազգի մոդելներ եւ հայտնի հյուրեր: Դիզայները ցուցադրության ֆոտոշարքը տրամադրել է NEWS.am STYLE-ին ու պատմել նորաձեւության շոուի մանրամասների մասին:
«Սա մեր հոբելյանական շոուն էր՝ նվիրված «Նինա Սարկիսյանց» բրենդի 10-ամյակին. մենք ուզում էինք գեղեցիկ շոու պատրաստել, որը կարտացոլեր այս տարիների մեր աշխատանքի արդյունքը»,-նշեց դիզայները:
Բրենդի ցուցադրությանը ներկայացված է եղել 20 հանդերձանք, որոնց վրա, Նինայի խոսքով, աշխատել են շուրջ մեկ տարի: Բոլոր զգեստները ձեռագործ են:
Ցուցադրությանը մասնակցել են նաեւ Հայաստանից հրավիրված մոդելներ.
«Դահլիճում ներկա էր մոտ 600 հյուր, նրանց թվում շատ հայտնի մարդիկ կային: Ետնաբեմում աշխատում էր շուրջ 100 մարդ։ Շոուն բացեց «Միսս Տիեզերք Արմենիա 2020» Մոնիկա Գրիգորյանը, իսկ «Միսս Երկրագունդ Հայաստան 2015», «Միսս Բիկինի Տիեզերք 2015», «Միսս Երկիր 2017»-ի հատուկ մրցանակակիր Լիլիթ Մարտիրոսյանը կատարեց փակումը։ Մոդելների շարքում է եղել նաեւ Հելեն Սիմոնյանը՝ Ջեք Թեքեյանի մոդելային գործակալությունից»,-ասաց Նինան:
Որպես հատուկ հյուր՝ միջոցառմանը ներկա են եղել «Միսս Հայաստան 1998», «Միսս ԱՊՀ 1999», «Միսս Գլոբ 2009» Գոհար Հարությունյանը, վարսահարդար Ջեք Թեքեյանը կնոջ հետ, ArmMod Fashion-ի հիմնադիր Ռուբինա Գրիգորյանը, հայտնի բլոգեր Ալվինա Ամիրյանը (Alvuwki) եւ դիմահարդար Մարիաննա Ղարիբյանը:
«Սա մեր առաջին մեծ շոուն չէ. մենք ամեն տարի խոշոր միջոցառումներ ենք անցկացնում աշխարհի տարբեր երկրներում: Հայաստանում այս աշնանը ցուցադրություն ենք ունեցել, հաջորդ տարի եւս նախատեսում ենք մեծ միջոցառում ունենալ: Մեզ համար Հայաստանն առանձնահատուկ երկիր է, մեր հայրենիքն ու մեր տունը, հետեւաբար՝ նախագծեր անելիս առաջին հերթին դրանք ծրագրում ենք Հայաստանում»,-հավելեց դիզայները:
Սյունե Առաքելյան