Զվարթնոց օդանավակայանում դիմավորում են «Մանկական Եվրատեսիլ 2021»-ում Հայաստանին հաղթանակ բերած Մալենային (ՈւՂԻՂ)

«Մանկական Եվրատեսիլ 2021»-ի հաղթողը՝ Հայաստանի ներկայացուցիչ Մալենան, վերադառնում է հայրենիք՝ իր հետ բերելով հաղթական գավաթն ու «Մանկական Եվրատեսիլ 2022» մրցույթը Հայաստանում հյուրընկալելու ուղեգիրը:

Զվարթնոց օդանավակայանում այս պահին Մալենայի ժամանմանն են սպասում ոչ միայն 14-ամյա երգչուհու հարազատներն ու ընկերները, այլեւ՝ մի շարք երկրպագուներ ու լրագրողներ:

NEWS.am STYLE-ը եւս եկել է դիմավորելու Հայաստանի հաղթող պատվիրակին, եւ օդանավակայանի անցուդարձը ներկայացնում է ուղիղ հեռարձակմամբ:

«Մանկական Եվրատեսիլ 2021»-ն անց էր կացվում Ֆրանսիայի մայրաքաղաք Փարիզում: Մեր պատվիրակը մրցույթում հաղթել է Դավիթ Բադալյանի (Tokionine), Վահրամ Պետրոսյանի ու Դավիթ Ծերունյանի հեղինակած «Քամի, քամի» երգով՝ վաստակելով 224 միավոր: Մալենան ինքն էլ երգի խոսքերի համահեղինակներից է: Երգչուհին մրցույթի առաջատարն էր նաեւ տեսահոլովակի դիտումների թվով  (ռեժիսոր՝ Արթուր Մանուկյան), իսկ մրցույթում Մալենայի ելույթն ամբողջացրել են «Ամարաս» համույթի պարողները (գեղարվեստական ղեկավար՝ Վիկա Մարտիրոսյան):

Սա Հայաստանի թվով երկրորդ հաղթանակն է «Մանկական Եվրատեսիլ»-ում: Առաջին անգամ մեր երկիրը մրցույթում հաղթել է 2010 թ-ին՝ Վլադիմիր Արզումանյանի գլխավորությամբ, որը ներկայացնում էր «Մամա» երգը: Հայաստանը «Մանկական Եվրատեսիլը» հյուրընկալել է նաեւ 2011 թ-ին:

Սյունե Առաքելյան, Մելինե Տոնոյան

Օպերատոր՝ Ալեքս Խաչատրյան