«Օլիմպիկոս» անիմացիոն ֆիլմի դիտումը՝ Արցախյան պատերազմի մասնակիցների երեխաների համար (ֆոտո)
16:08 28 դեկտեմբերի, 2021Երեւանի Սուրբ Գրիգոր Լուսավորիչ Մայր եկեղեցու «Հավատամք» հոգեւոր միությունը՝ Տեր Հակոբ քահանա Խաչատրյանի առաջնորդությամբ, այսօր՝ դեկտեմբերի 28-ին, «Մոսկվա» կինոթատրոնում նախաձեռնել էր «Օլիմպիկոս» անիմացիոն ֆիլմի դիտումը՝ Արցախյան պատերազմի մասնակիցների (վիրավորների, զոհերի, անհետ կորածների, գերիների), Հայաստանում ապաստանած արցախահայերի, սոցիալապես անապահով ընտնանիքիների եւ եկեղեցու համայնքի երեխաների համար: Միջոցառումը մեկնարկեց միասնական աղոթքով ու երեխաների հետ՝ իրենց երազանքների մասին զրույցով:
Նախատեսված էին նաեւ այլ անկնկալներ. երեխաները, Տեր Հակոբի գլխավորությամբ, զարդարեցին «Հավատամք» տոնածառը՝ դրա վրա փակցնելով իրենց ամենաբարի մաղթանքներն ու ցանկությունները, իսկ կինոդիտումից հետո ստացան նվերներ ու Մանկական Աստվածաշունչ:
Տեր Հակոբ քահանա Խաչատրյանի խոսքով՝ այս նախաձեռնությունը միտված է ոգեկոչելու այն գաղափարը, որ բացի խոսքերից՝ մարդկանց պետք է սատարել եւ օգնել գործով: Նա շեշտեց, որ եթե յուրաքանչյուր հայ ունենա այն նվիրումն ու հավատքը, որն ունեին 44-օրյա պատերազմի միջով անցած մեր հերոսները, իր մեծ ներդրումը կունենա Հայաստանի զարգացման ու ներդաշակության գործընթացում:
«Այստեղ բոլոր այն երեխաներն են, որոնց ծնողնեն իրենց հավատքն արտահայտել են իրենց գործով, նաեւ՝ այն ընտանիքների երեխաները, որոնց ծնողներն իրենց ամենաթանկ բանը նվիրաբերեցին մեր հավատքին ու հայրենիքին` իրենց կյանքը տվեցին մեր երկրի, իրենց երեխաների ապրելու համար: Նրանց զոհաբերությունն իրենց փրկության համար չէր, այլ` հայրենիքի, իրենց սիրելիների ու մի ամբողջ ժողովրդի: Նրանց այդ գործը ճիշտ չի լինի միայն խոսքով գնահատելը, նրանք գործի օրինակ մեզ թողեցին: Այս միջոցառումը նաեւ լավ օրինակ է երեխաների համար, որպեսզի նրանք սովորեն, որ խոսքը ոչինչ է, եթե այն չի դրսեւորվում գործով»,-ասաց նա:
Ըստ հոգեբանների՝ «Օլիմպիկոսը» հոգեբանորեն ծանր պայմաներում օգնում է հաղթահարել դժվարություններն ու գտնել ապրելու ուժ: Անդրադառնալով այս մուլտֆիլմի ընտրությանը՝ Տեր Հակոբը հավելեց.
«Այս մուլտֆիլմն ընտրվեց, որովհետեւ այն ունի դաստիարակչական նշանակություն, քանի որ մեր նախաձեռնության նպատակը միայն երեխաների ժամանցն ապահովելը չէր: Նրանց նպատակը պիտի լինի կյանքում իրենց ճիշտ դրսեւորելը: Այս մուլտֆիլմը նաեւ սերմանում է հայրենասիրություն, մարդասիրություն եւ իր բովանդակությամբ կարեւոր նշանակություն ունի»:
«Հավատամք» հոգեւոր միության անդամները վստահեցնում են՝ նման նախագծերը շարունակական բնույթ կկրեն:
Սյունե Առաքելյան