Փետրվարի 4-ին ժամը 19:00 «Արամ Խաչատրյան» համերգասրահում՝ Հովհաննես Չեքիջյանի ղեկավարությամբ, տեղի կունենա Հայաստանի ազգային ակադեմիական երգչախմբի եւ Հայաստանի ազգային ֆիլհարմոնիկ նվագախմբի համատեղ համերգը։ Կհնչի Ջոակինո Անտոնիո Ռոսինիի «STABAT MATER» ստեղծագործությունը։
Մենակատարներն են՝ Սոֆյա Սայադյանը (սոպրանո), Քրիստինե Սահակյանը (մեցցո սոպրանո), Միքայել Գրիգորյանը (տենոր), Զոհրաբ Զոհրաբյանը (բաս):
Stabat Mater-ը հոգեւոր քրիստոնեական երգ է լատիներեն լեզվով, որը պատմում է խաչված Որդու խաչի առջեւ սգացող Աստվածամոր մասին: Անվանումն առաջացել է հիմնի առաջին տողից «Stabat Mater dolorosa», ինչը նշանակում է «Կանգնած էր սգավոր մայրը»։
Ամբողջական ստեղծագործության բաց պրեմիերան տեղի է ունեցել 1842 թվականի հունվարի 7-ին՝ Փարիզի Իտալական թատրոնի դահլիճում իտալացի օպերային երգիչների կատարմամբ։ Ականատեսները պատմում են, որ Փարիզը մեծ փառքով էր ընդունել ստեղծագործությունը, իսկ հանդիսատեսը բուռն ծափահարություններով բացականչում էր․ «Ռոսինի՜, Ռոսինի՜»։