EXCLUSIVE. Վաչե Ամարյանի «Օլյա»-ի գաղտնիքները բացահայտված են

Երգիչ Վաչե Ամարյանը, ում «Բալա» երգն իսկական հիթ էր դարձել ոչ միայն Հայաստանում, այլեւ Ռուսաստանում, Վրաստանում եւ այլ երկրներում, երկրպագուներին անակնկալ էր խոստացել, որը եւ մատուցեց «Օլյա» երգի տեսքով: Վերջինը, սակայն, ռումբի նման ընդունվեց հանդիսատեսի կողմից. քննադատում էին թե՛ երգի անհասկանալի բառերը, թե՛ Վաչեի ռուսերենը: NEWS.am STYLE-ը զրուցեց «Օլյա»-ի հեղինակների հետ եւ պարզեց մանրամասները:

«Երգի կրկներգի բառերը ոչ մի իմաստ չունեն: Դրանք ընդամենը հասկացվում են որպես ինչ-որ հնադարյան կախարդական լեզվով արտահայտված կախարդանք-աղոթք, եւ շարունակվող ռուսերեն բառերի պարզաբանմամբ հասկացվում է, որ այդ կախարդանքն ամեն անգամ երազում հնչում է երգի հերոսի գլխում: Երգի հիմնական իմաստը նրանում է, որ չար ուժերը փորձում են ասեկոսների, բամբասանքների, կախարդանքի միջոցով քանդել սիրո հարաբերությունները երգի հերոսի եւ իր սիրելի Օլյայի միջեւ»,- պարզաբանում է երգի խոսքերի հեղինակ Դավիթ Օհանը:

«Քանի որ աշխատանքային նյութի մեջ Վաչեն երգել էր «Օլյա բոչա եւ այլն», դա շատ երաժշտական էր հնչում: Որոշեցինք որոշ տեղերում պահպանել այդ տարօրինակ բառերը: Եվ քանի որ առաջին բառը մոտ էր հնչում Օլյա անվանը, որոշվեց երգի հերոսուհուն Օլյա կոչել»,- բացատրեց Ամարյանի պրոդյուսեր Կարեն Համբարձումյանը:

Ինչ վերաբերում է քննադատություններին՝ Վաչեն դրանց վատ չի վերաբերվում. «Շատ հանգիստ եմ այդ ամենին նայում եւ առանց հիասթափության, որովհետեւ համոզված եմ, որ իմ արածը կգտնի իր իսկական ունկնդրին»:

«Կարծում եմ, որ Վաչեի հանդիսատեսը եւ, ընդհանուր առմամբ, ժողովուրդը շատ լավ են ընդունել այս աշխատանքը, որովհետեւ այս երգը լսելի է քաղաքի տարբեր անկյուններում: Երգիչն արդեն առաջարկներ ունի այդ երգով ելույթ ունենալու մի քանի միջոցառումների: Իսկ որոշ սոցկայքերում միշտ բողոքելու սովորություն ունեցող մարդկանց հարձակումները ոչնչով չեն կարող խանգարել երգի բարեհաջող ընթացքին, եթե այն իսկապես սիրվի ժողովրդի կողմից»,- հավելեց Կարեն Համբարձումյանը: 

Մարինա Ադուլյան