Անաստասիա Վոլոչկովան մոսկովյան մետրոյում ցնցել է 30 նստում վարժությամբ
11:03 13 նոյեմբերի, 2013Ռուսական բալետի արտիստուհի Անաստասիա Վոլոչկովան, հայտնվելով մոսկովյան մետրոյում, զարմացրել է բոլորին: Նա մետրո է մտել եւ մեկ տոմսի համար բալետային 30 խորը նստում կատարել: Այս մասին տեղեկացնում է «Дни» պարբերականը:
Այդ կերպ աստղը որոշել է աջակցել ապորտային ակցիային, որը համապատասխան թվով նստում վարժության դեպքում մետրոյի մեկ տոմս է նախատեսում:
Պարուհին կարողացել է ոչ միայն կատարել նորման, այլեւ գերազանցել է իր շուրջը հավաքված բոլոր մրցակիցներին: Ընդ որում, Վոլոչկովայի նստումները պարզունակ չեն եղել, քանի որ գրան-պլիեի ժամանակ անհրաժեշտ է ծնկներն առավելագույնս հեռացնել միմյանցից՝ կրունկները միայն թեթեւակիորեն կտրելով հատակից:
Այսպիսով, Անաստասիան ստացել է օլիմպիական խորհրդանիշով մետրոյի տոմսը: Իհարկե, նա այդպես էլ մետրո չի նստել, այլ դուրս գալով՝ հեռացել է իր Lexus-ով: Մինչ այդ, Նաստյան հասցրել է լուսանկարվել անվտանգության պահպանության աշխատակիցների հետ եւ նկարը հրապարակել Instagram-ում:
«Չէի կարող չաջակցել»,- «սպորտային ակցիա»-ին իր մասնակցությունը մեկնաբանել է Վոլոչկովան:
Նշենք, որ Սոչիում կայանալիք Օլիմպիադայի նախաշեմին նոյեմբերի 8-ին Մոսկվայի մետրոպոլիտենում արտասովոր սարք է դրվել, որը տոմս է տալիս 30 նստում վարժության դեպքում: Այն մետրոյում կմնա մինչեւ դեկտեմբերի 3-ը: