«Երբ ես Ստեփանակերտում էի, եւ մեզ ռմբակոծում էին «Բայրաքթարներն» ու «Տոչկա-Ու»-երը, ոչ ոք չխոսեց ագրեսիայի դեմ». Վիտալի Միլոնով (վիդեո)

22:35   21 մայիսի, 2022

Կարեն Ադամյանի YouTube-յան «MAKARENA» շոուի հերոսը ՌԴ Պետդումայի պատգամավոր Վիտալի Միլոնովն էր, որը ներկայացրել է իր դիրքորոշումն Ուկրաինայում տիրող իրավիճակի եւ Ռուսաստանում ստեղծված իրավիճակի շուրջ։  Միլոնովը դատապարտել է նրանց, ովքեր, ըստ նրա, հատուկ գործողության մեկնարկով փախել են արտերկիր, հատկապես շոու-բիզնեսի ներկայացուցիչները, բանկիրները, ձեռնարկատերերը... Պատգամավորն ընդգծել է, որ դատապարտում է նրանց լռության համար, այդ թվում նաեւ այն բանի համար, որ ութը տարի աչք են փակել այն ամենի վրա, ինչ կատարվում էր Դոնեցկի Ժողովրդական Հանրապետությունում։

 «Երբ ես Ստեփանակերտում էի, եւ «Բայրաքթարներն» ու «Տոչկա-Ու»-երը ռմբակոծում էին մեզ, ոչ ոք չխոսեց ագրեսիայի դեմ։ Կային եւ «ԻԳԻԼ»-ի «բարմալեյները», եւ թուրքական բանակն էր այնտեղ։ Ոչ ոք մարդկային կարեկցանք չի հայտնել Արցախի ժողովրդին, երբ նրանք ենթարկվել են այս նենգ հարձակմանը։ Ոչ թե զինվորականները, այլ քաղաքացիական անձինք։ Ոչ ոք չանհանգստացավ այն փաստով, որ այնտեղ փախստականներ են, մարդիկ մնացել են անօթեւան... Ջաբրայիլից, Աղդամից։ Երբ մարդիկ փախան՝ չհասցնելով իրենց հետ որեւէ բան վերցնել։ Նրանք անհանգստանում էին միայն այն կյանքերի համար, որոնց մասին մոդայիկ է անհանգստանալը»,- ասել է Միլոնովը, որը նաեւ նշեց, որ իր նախապապը ցարական Ռուսաստանի օրոք եղել է Երեւանի գլխավոր դատավորներից մեկը։

Միլոնովը հայտնել է նաեւ, որ վերջերս եղել է Երեւանում, որտեղ նկարահանող խմբի հետ աշխատել է հատուկ գործողությունների պատճառով Հայաստան տեղափոխված ռուս միգրանտների մասին ֆիլմի վրա։ Պատգամավորի խոսքով՝ իր զրուցակիցներից շատերը տեղափոխվել են արտերկիր, քանի որ ներկա պայմաններում չեն կարողացել շարունակել աշխատել․ ինտերնետ հասանելիության հետ կապված խնդիրներ, բանկային փոխանցումների խափանումներ եւ այլն... «Նրանց ուղղված հարցեր չկան։ Տեխնիկական արգելափակումներն անհնարին են դարձնում իրենց աշխատանքը։ Եվ այդ մարդկանց մեծ մասն ասում է՝ գնացել ենք Երեւան, բայց պատրաստ ենք վերադառնալ»․․․



© NEWS.am STYLE