Դիզայներ Քրիստինե Գրիգորյանի նորաձեւության շոուն, փոքրիկ մոդելներն ու երեկոյի հայտնի հյուրերը (ֆոտո)

Դիզաւյներ Քրիստինե Գրիգորյանը երեկ՝ հունիսի 17-ին, նորաձեւության տոն պարգեւեց մի շարք մանուկների, որոնց հնարավորություն ընձեռեց ցուցադրելու իր՝ 3 տարբեր հավաքածուները։ Ցուցադրությանը մասնակցում էր 25 երեխա՝ այդ թվում դիզայների դպրոցի սաներն, անապահով ընտանիքների եւ մանկատան երեխաները։ Միջոցառման նպատակը երեխաներին նորաձեւությանը ծանոթացնելն ու նրանց մեջ հավասարություն սերմանելն էր։

«Նպատակը այն է, որ երեխաներին փոքրուց ծանոթացնենք գեղեցիկին, որպեսզի նրանք կարողանան արվեստին մոտ լինել։ Կարծում եմ՝ երեխաներին պետք է երեք տարեկանից սովորեցնել գունագեղությանը, ոճաբանությանը եւ էթիկայի կանոններին, որոնք, ըստ իս, կարեւոր են հասարակությանը պիտանի մարդիկ ձեւավորելու համար։ Նաեւ մեր նպատակն է աջակցել անապահով ընտանիքների եւ մանկատան երեխաներին, քանի որ նրանք հաճախ չեն լինում այսպիսի միջոցառումների, եւ սա նրանց համար մեծ երեւույթ է, երեկո, որտեղ իրենց զգում են արքաներ եւ արքայադուստրեր, եւ ես տարվա մեջ երկու անգամ նրանց այս տոնը պարգեւում եմ»,-լրագրողների հետ զրույցում նշեց դիզայները։

Փոքրիկ մոդելները շոուին ցուցադրեցին Kwisty Fashion-ի ամառային, կաշվե եւ երեկոյան զգեստները։ Ցուցադրության շրջանակում ազդարարվեց նաեւ մրցույթ, որի արդյունքում տարբեր անվանակարգերում բոլոր երեխաներն արժանացան թագերի ու նվերների։ Մրցույթի ժյուրիի կազմում էին Նատալյա Ռոտենբերգը, երգիչ Վրեժ Կիրակոսյանը, մոդել, լրագրող Անի Քոչարը եւ դերասանուհի Լուիզա Ներսիսյանը։

Նատալյա Ռոտենբերգն առաջին անգամ էր նման միջոցառման շրջանակում հանդես գալիս, որպես ժյուրիի անդամ։ Որքան էլ պատասխանատու էր քայլը, Ռոտենբերգն ուրախ է, որ բոլոր երեխաները կարողացան զգալ հավասար ուշադրություն ու սեր։

«Ինձ համար կարեւոր է հենց այս ընկերական մթնոլորն ու այն փաստը, որ երեխաներից յուրաքանչյուրն այստեղից հեռանալու է նվերներով ու բարձր տրամադրությամբ։ Երեխաները չպետք է զգան ինչ-որ տարբերություն իրենց նկատմամբ։ Սպորտում ամեն ինչ այլ է, քանի որ գնահատվում են պրոֆեսիոնալիզմն ու աշխատասիրությունը, բայց այսօրվա միջոցառումն այդ մասին չէ, այն միավորելու միտում ունի, եւ նպատակն այն է, բոլոր երեխաները միմյանց նկատմամբ հավասարություն զգան»,-նշեց նա։

Միջոցառման հատուկ հյուրերի շարքում էին ինչպես շոու-բիզնեսից, այնպես էլ այլ որոտներից հայտնի մարդիկ, ներկա էր նաեւ բրիտանացի հայտնի բլոգեր Լուկա Գալոնեն։ Երեկոն վարում էր Եգոր Գլումովը, երաժշտական համարներով հանդես եկան Սոֆի Մխեյանը, Սիլվա Հակոբյանը, Վրեժ Կիրակոսյանը եւ Լիդուշիկը։ Շոուի մյուս մանրամասներն ու հայտնիները՝ ֆոտոշարքում։

Սյունե Առաքելյան