«Հորինելով Աննային» ֆիլմում զրպարտության համար Netflix-ին դատի են տվել
23:12 30 օգոստոսի, 2022Vanity Fair-ի նախկին լրագրող Ռեյչել Ուիլյամսը դատի է տվել Netflix-ին՝ «Հորինելով Աննային» ֆիլմում զրպարտության համար։ Այս մասին հայտնում է The Independent-ը։
Խոսքը սերիալում լրագրողի անունով հերոսուհու հայտնվելու մասին է։ Ըստ Ուիլյամսի՝ նա նախագծում ներկայացվել է որպես ոչ բարոյական, ագահ, վախկոտ եւ անազնիվ։ Կինը պնդում է, որ կերպարը չի համապատասխանում իրականությանը եւ վարկաբեկում է իր անձը։
Լրագրողի փաստաբան Ալեքսանդր Ռուֆուսա-Այզերի խոսքով՝ ֆիլմի թողարկումից հետո իր պաշտպանյալը սոցիալական ցանցերում բախվել է կոշտ քննադատության ու բացասական մեկնաբանությունների։
«Հորինելով Աննային» սերիալի պրեմիերան տեղի է ունեցել 2022 թվականի փետրվարին։ Նախագիծը հիմնված է խարդախ Աննա Սորոկինայի կյանքի վրա, որն առավել հայտնի է Աննա Դելվի անունով։
Աղբյուրը՝ Gazeta.ru