Լոնդոնում սկսվել է Մեծ Բրիտանիայի թագուհի Եղիսաբեթ II-ի հուղարկավորության արարողությունը։
News.am Style ձեզ է ներկայացնում արարողության մի քանի մանրամասներ:
Թագավորն ու հանգուցյալ թագուհու մյուս զավակները, բացի Յորքի դուքս արքայազն Ենդրյուից կրում են զինվորական համազգեստ: Զինվորական համագեստ է կրում նարե Ուելսի արքայազնը՝ Ուիլիամը, իսկ արքայազն Հարրիին իր զինվորական համազգեստը կրելու իրավունք չեն տվել. նա ներկայացել է ֆրակով՝ կրելով զինվորական մեդալները:
Թագավորական ընտանիքի մյուս կանայք եւ աղջիկները, կրում են սեւ դասական զգեստներ՝ դասական գլխարկների կամ գլխակապերի հետ համադրելով: Հայտնի է, որ թագավորական ընտանիքում, դարեր ի վեր, սգո արարողություններին համապատասխան են համարվել մարգարիտները: Ուելսի արքայադուստրը, ի նշան հարգանքի, կրել է թագուհու երբեմնի հավաքածուին մաս կազմող մարգարտյա վզնոց եւ օղեր: Մարգարտյա օղեր է կրել նաեւ արքայազն Հարրիի կինը՝ Սասեքսի դքսուհի Մեգանը, ով ներկայացել է թիկնոցավոր զգեստով եւ լայնեզր գլխարկով: Նույն օղերը դքսուհին կրել էր ամուսնությունից հետո՝ թագուհու հետ իր առաջին միջոցառման ժամանակ: Մարգարիտի եւ ադամանդի համադրությամբ օղերն ու ոսկյա թեւնոցը, որը զարդարել է դքսուհու դաստակը, նրան նվիրել է հանգուցյալ թագուհին, հայտնում է Harpers Bazaar-ը:
Թագավորական ընտանիքի ինստագրամյան էջում հրապարակված տեղեկության համաձայն`ծաղկեպսակը, որը զարդարում է թագուհու դագաղը, կամված է Չարլզ թագավորի պահանջով: Բուքինգհեմյան պալատի այգիներից կտրված ծաղիկներն իրենց նշանակությունն ունեն: Ծաղկեպսակում ընդգրկված Միրթուս ծաղիկը թագավորական այգիներում ցանվել է թագուհու հարսանեկան ծաղկեփնջից վերցված մի ճյուղից: Այս ծաղիկը հայտնի է, որպես երջանիկ ամուսնության խորհրդանիշ:
Ինչպես արդե տեղեկացրել ենք`դագաղը կբերեն Վեսթմինսթերյան աբբայություն, որտեղ տեղի կունենա հիշատակի արարողություն, ապա թագուհու մարմինը հողին կհանձնեն`ամուսնու`արքայազն Ֆիլիպի կողքին: