«Հայ ֆեստ» փառատոնի բացումն ու Հրաչուհի Ութմազյանի անանկնկալը՝ Արթուր Ղուկասյանին (ֆոտո/վիդեո)
16:08 2 հոկտեմբերի, 2022Երեկ՝ հոկտեմբերի 1-ին, Ստանիսլավսկու անվան ռուսական դրամատիկական թատրոնում կայացավ «Հայ ֆեստ» կատարողական արվեստի միջազգային փառատոնի պաշտոնական բացումը։ Փառատոնի համար այս տարին հոբելյանական է՝ այն անցկացվում է 20-րդ անգամ՝ «Հաջորդ 20 տարիները կլինեն ավելի լավը» խորագրի ներքո։ «Հայ ֆեստ»-ի հիմնադիր նախագահ Արթուր Ղուկասյանը նշում է․
«Իհարկե, այս օրերին տոնական տրամադրություն չունենք, բայց փորձում ենք թատերական կյանքի որակն ապահովել։ Իմ կարծիքով հենց մշակույթն է մարդուն մարդ դարձնում, մեզ թույլ տալիս, որ ասենք՝ ամեն ինչ լավ է լինելու։ Մշակույթի ոլորտում ժամանակակից միտումը կրթությունն է։ Պետք է լինել շատ ակտիվ, դիտել ներկայացումներ, գնալ համերգների, ցուցահանդեսների, եւ դա 21-րդ դարի քաղաքացու դիրքորոշումն է։ Իսկ այն, որ հաջորդ քսան տարիները լինելու են ավելի լավը, խոսում է այն մասին, որ մենք լավատեսորեն ենք մոտենում ամեն ինչին, եւ, իհարկե, հաջորդող փառատոնները պետք է լինեն ավելի լավը»։
Ղուկասյանին հենց բեմին յուրահատուկ անակնկալ մատուցեց հաղորդավարուհի Հրաչուհի Ութմազյանը։ Նա որոշել էր փառատոնի 20-ամյակը շնորհավորել տորթով, սակայն դրա վրա մոմեր չէր դրել` նախընտրելով հումորային մոտեցումը (նայիր տեսանյութում)։
Посмотреть эту публикацию в Instagram
20-րդ «Հայ ֆեստ»-ը բացվեց ռումինական «ԷՄ Ստուդիո»-ի «Վերելակ» պարային ներկայացմամբ։ Ինքնատիպ բեմադրությունը երաժշտության ու ժեստերի լեզվով ցուցադրում էր մարդկային հոգեվիճակը փակ տարածության մեջ։ Պարաբեմադրիչը Ֆեհեր Ֆերենցն է։
«Հայ ֆեստ»-ը շարունակվելու է մինչեւ հոկտեմբերի 8-ը ներառյալ։ Փառատոնն իրականացվում է ՀՀ ԿԳՄՍ նախարարության աջակցությամբ։ Թատերական իրադարձությունն այս տարի կհյուրընկալի 10 երկրից ժամանած ավելի քան 250 մասնակիցների` այդ թվում հեղինակավոր արվեստագետների, արտմենեջերների, միջազգային փառատոնի նախագահների` Ռումինիայից, Ռուսաստանից, Կիպրոսից, Գերմանիայից, Իսրայելից, Էստոնիայից, Իրանից եւ այլ երկրներից:
Փառատոնի հեդլայները Սանկտ Պետերբուրգի Բորիս Էյֆմանի բալետի ակադեմիական թատրոնի «Ռոդեն` նրա հավերժ կուռքը» ներկայացումն է, որը կցուցադրվի հոկտեմբերի 5-ին եւ 6-ին:
Սյունե Առաքելյան