«Առաջարկվել է նաեւ տեսաուղերձ ուղարկել, ինչը եւս մերժվել է»․ Առաջին ալիքի պատասխանը՝ «Մանկական Եվրատեսիլ 2022»-ին Ռուսաստանի ներկայացուցիչների հրավերի վերաբերյալ
17:55 1 նոյեմբերի, 2022«Մանկական Եվրատեսիլ 2022» երգի մրցույթի ստեղծագործական թիմը նախապես կապ է հաստատել մրցույթի բոլոր հաղթողների կամ հանրային հեռարձակողների հետ առանց բացառության, այդ թվում՝ «Մանկական Եվրատեսիլ» մրցույթում Ռուսաստանի պրոդյուսերական թիմի հետ: Այս մասին NEWS.am STYLE-ի հետ զրույցում նշեց Հանրային հեռուստաընկերության հաղորդակցության ղեկավար Աննա Օհանյանը՝ անդրադառնալով ՌԻԱ «Նովոստի»-ին տված հարցազրույցում պրոդյուսեր Սերգեյ Մասլովի հայտարարությանը։ Վերջինը նշել էր, որ Երեւանում կայանալիք «Մանկական Եվրատեսիլ 2022»-ին, որին ելույթ են ունենալու մրցույթի բոլոր տարիների հաղթողնրը, Ռուսաստանին 2006 թ-ին հաղթանակ բերած Անաստասիա եւ Մարիա Տոլմաչյովաները հրավեր չեն ստացել։
Աննա Օհանյանի խոսքով՝ հրավերին ի պատասխան՝ նշվել է, որ երգչուհիների ներկայությունը հոբելյանական միջոցառմանը նպատակահարմար չէ:
«Առաջարկվել է նաեւ տեսաուղերձ ուղարկել, ինչը եւս մերժվել է: Այնուամենայնիվ, Հայաստանի հանրային հեռուստաընկերության առաջարկը շարունակում է ուժի մեջ մնալ, եւ «Մանկական Եվրատեսիլի» ստեղծագործական թիմը պատրաստ է հյուրընկալել Անաստասիա եւ Մարիա Տոլմաչեւներին»,-հավելեց նա։
«Մանկական Եվրատեսիլը» տեղի է ունենալու դեկտեմբերի 11-ին՝ Կարեն Դեմիրճյանի անվան մարզահամերգային համալիրում։ Այս տարվա մրցույթը հոբելյանական է, այն անցկացվելու է 20-րդ անգամ, ինչով պայմանավորված էլ նախատեսվել է հատուկ ելույթ՝ մրցույթի բոլոր տարիների հաղթողների մասնակցությամբ։
Հայաստանն այս տարվա մրցույթին ներկայացնելու է 14-ամյա Նարե Ղազարյանը։
Սյունե Առաքելյան
Լուսանկարները՝ Առաջին ալիքի, junioreurovision.tv-ի