46 տարի առաջ այս օրը տեղի է ունեցել Սուրբ Սարգիս եկեղեցու օծման արարողությունը
22:45 3 նոյեմբերի, 20221976 թվականի նոյեմբերի 3-ին, 5 տարվա վերանորոգման աշխատանքներից հետո, տեղի է ունեցել Սուրբ Սարգիս եկեղեցու oծման հանդիսավոր արարողությունը:
Վեհափառ հայրապետ Վազգեն Առաջինն իր քարոզում նշել է. «Քաղաքամայր Երեւանն օժտվեց մի նոր զարդով, հայկական ճարտարապետության մի նոր կոթողով, աղոթքի սքանչելի սրբավայրով»։
Ներկայիս Սուրբ Սարգիս եկեղեցին կառուցվել է 1835-ից 1842 թվականներին եւ վերանորոգվել 1972-76 թվականներին՝ ճարտարապետ Ռաֆայել Իսրայելյանի գլխավորությամբ եւ վեհափառ հայրապետի հովանու տակ: Իսրայելյանի մահից հետո շինարարական աշխատանքները գլխավորել է ճարտարապետ Գալիկյանը: Շենքի դիմային պատը ծածկվել է Անիից բերված տուֆ քարով: Զանգակատան վերականգնումն ավարտվել է 2000 թվականին: Եկեղեցին հանդիսանում է առաջնորդանիստ կառույց:
Մինչ ներկայիս եկեղեցու կառուցումը նույն վայրում գործել են երեք եկեղեցիներ`Սուրբ Սարգիս, Սուրբ Գեւորգ եւ Սուրբ Հակոբ, ինչպես նաեւ առաջնորդարանի եւ թեմական դպրոցները, եղել է այգի եւ այլ կառույցներ: Եկեղեցիները սակայն, 1679 թվականի երկրաշարժից ավերվել են: