2023 թվականից «Եվրատեսիլ» երգի մրցույթի կանոնները կփոխվեն. մրցույթին չմասնակցող երկրների հեռուստադիտողները առաջին անգամ կարող են քվեարկել իրենց սիրելի կատարողի օգտին։ Այս մասին ասվում է Եվրոպական հեռարձակողների միության (EBU) պաշտոնական կայքում տեղադրված հայտարարության մեջ։
«Առաջին անգամ չմասնակցող երկրներում դիտողները կարող են առցանց քվեարկել իրենց սիրելի երգերի օգտին: Նրանց ձայները կամփոփվեն եւ կվերածվեն միավորների, որոնք կունենան նույն կշիռը, ինչ կիսաեզրափակիչ եւ եզրափակիչ փուլերի մասնակից մեկ երկիրը»,- ասված է հայտարարության մեջ։
Նշենք, որ «Եվրատեսիլ» երգի մրցույթն անցկացվում է ամեն տարի՝ սկսած 1956 թվականից եւ հանդիսանում է ամենահայտնի երաժշտական իրադարձություններից մեկն աշխարհում։ Մրցույթի լսարանը հասնում է 600 միլիոն մարդու։