Էմիր Կուստուրիցան դարձավ 68 տարեկան. 3 ֆիլմ ռեժիսորի կինոցանկից

16:48   24 նոյեմբերի, 2022

Սերբ կինոռեժիսոր Էմիր Կուստուրիցան այսօր դարձել է 68 տարեկան: Կինոռեժիսորը ծնվել է այն ժամանակ դեռեւս Հարավսլավիայի կազմի մեջ մտնող Բոսնիա ե Հերցոգովինայի միացյալ հանրապետության մայրաքաղաք Սարաեւոյում: Չնայած նրան, որ ծնողները մուսուլմաններ են եղել, Կուստուրիցան պնդում է, որ նախնիները ուղղափառ սերբեր են եղել:

Աշխարհահռչակ կինոռեժիսորը մասնագիտական կրթությունը սկսել է Պրահայի կիրառական արվեստների հեղինակավոր ակադեմիայի կինոյի եւ հեռուստատեսության ֆակուլտետից: Հենց այդ ժամանակ էլ Կուստուրիցան նկարահանել իր առաջին կարճամետրաժ «Ճշմարտության մի մասը» (1971) եւ «Աշուն» (1972) ֆիլմերը, իսկ դիպլոմային աշխատանքը 1978 թվականին եղել է «Հերնիկա» (1978) 25 րոպեանոց ֆիլմը, որը պատմում է հրեական տղայի մասին, ով ապրել է 1930-ականների վերջիներին։ Ֆիլմը հակասեմականության եւ նացիզմի դեմ է:

Կրթությունն ավարտելուց հետո կինոռեժիսորը վերադարձել է Սարաեւո, որտեղ դասավանդման փորձ ձեռք բերելուց հետո ընդունել է ԱՄՆ-ի Կոլումբիայի համալսարանում դասախոսելու հրավերը: Սակայն «Արիզոնական երազանք» (1993) ֆիլմի ձախողումից հետո ռեժիսորը վերադարձել է Հարավսլավիա:

Կուստուրիցան իր ֆիլմերի համար արժանացել է «Արծաթե արջ» մրցանակի, երկու «Ոսկե Արմավենու», Պատվավոր լեգեոնի շքանշանի ասպետի կոչման: 2007 թվականի սեպտեմբերի 8-ին Կուստուրիցան՝ մի շարք այլ սերբ գործիչների հետ ճանաչվել է ՅՈՒՆԻՍԵՖ-ի բարի կամքի դեսպան Սերբիայում։ Ռեժիսորն այժմ բնակվում է Դրվենգրադում՝ հենց իր կողմից հիմնված գյուղում, որը կառուցվել է «Կյանքը հրաշալի է» ֆիլմի համար։

«Հիշո՞ւմ ես արդյոք Դոլի Բելին» (1981)

«Հիշո՞ւմ ես արդյոք Դոլի Բելին» ֆիլմն առաջին հարավսլավական ֆիլմն էր, որը ոչ թե պաշտոնական սերբախորվաթական լեզվով էր, այլ բոսնիական բարբառով։ Այն Կուստուրիցային առաջին մեծ հաջողությունն է բերել`արժանացնելով Լավագույն դեբյուտային ֆիլմ անվանակարգում հաղթանակի եւ FIPRESCI մրցանակին Վենետիկի միջազգային կինոփառատոնում։

«Հայրիկը գործուղման է» (1985)

Այն պատմում է պատերազմի մասին երեխայի աչքերով: Ֆիլմը ռեժիսորին  «Ոսկե արմավենու» եւ FIPRESCI-ի է արժանացրել Կաննի կինոփառատոնում:

«Ընդհատակ» (1995)

Ֆիլմում ռեժիսորն իր երկրի անցյալը կապել է նորագույն շրջանի պատմությանը: Ֆիլմը հակասական արձագանքների է արժանացել,ինչից ելնելով էլ ռեժիսորը, նշելով, որ իրեն չեն հասկացել, հայտաարարել էր կինոմատոգրաֆիան թողնելու մասին: Հակառակ դրան՝ ֆիլմը ռեժիսորին բերել է երկրորդ «Ոսկե արմավենին» Կաննի կինոփառատոնում՝ այդպիսով նրան դարձնելով չորրորդ կրկնակի մրցանակակիրը:



© NEWS.am STYLE