1897 թվականի այս օրը ծնվել է հայ դերասան, ՀԽՍՀ ժողովրդական արտիստ, ԽՍՀՄ ժողովրդական արտիստ եւ Ստալինյան մրցանակի դափնեկիր Ավետ Ավետիսյանը(Ոսկանյան):
Դերասանը ծնվել է Թիֆլիսում եւ նախնական կրթությունը ստացել տեղի Ներսիսյան դպրոցում, որը հայ իրականության ամենահայտնի կրթական հաստատություններից մեկն է եղել: Բանակում ծառայությունն ավարտելուց հետո Ավետիսյանը Բաքվում մասնակցել է Հովհաննես Աբելյանի թատերախմբի ներկայացումներին, այնուհետեւ Աբելյանի հետ վերադարձել Թիֆլիս եւ սկսել հանդես գալ հայ դրամատիկական թատերախմբում:
1920-1921 թվակններին կարիերան շարունակել է Վանաձորի թատրոնում եւ 1922 թվականին վերադարձել Երեւան` դառնալով մայր թատրոնի` Գաբրիել Սունդուկյանի անվան թատրոնի դերասան, որտեղ էլ խաղացել է մինչեւ կյանքի վերջը: Ավետ Ավետիսյանը նկարահանվել է 28 ֆիլմում, որոնցից հայտնի են «Նամուս»-ը, «Կիկոս»-ը, «Պեպո»-ն, «Պատվի համար»-ը, «Ինչու՞ է աղմկում գետը» եւ «Մորգանի Խնամին» ֆիլմերը: