Արքայադուստր Դիանայի վզնոցը կհանվի աճուրդի (ֆոտո)

Արքայադուստր Դիանայի խաչով վզնոցը, որը պատրաստված է ամեթիստից ու ադամանդներից կվաճառեն Sotheby’s աճուրդում։ Garrard-ի ոսկերչական տան զարդերը գնահատվում են 120 000 ֆունտ ստեռլինգ: Royal & Noble-ի ամենամյա աճուրդը մեկնարկում է հունվարի 6-ին։ Այս մասին հայտնում է WWD-ն։

Արքայադուստր Դիանան վզնոցը կրել է 1987 թվականին բարեգործական պարահանդեսի ժամանակ: Մեծ Բրիտանիայի թագավոր Չարլզ III-ի նախկին կինն այն համադրել է դիզայներ Քեթրին Ուոքերի զգեստի հետ։ Ի դեպ, հենց Գարարդն է ստեղծել արքայադստեր նշանադրության մատանին, ինչպես նաեւ բրիտանական գահի ժառանգորդի հետ նրա հարսանիքի համար ձեւափոխել է Սպենսերների ընտանեկան պսակաթագը:

Վերջին տարիներին խաչի վզնոցը պատկանում էր Asprey & Garrard-ի նախկին ղեկավար Նաիմ Աթթալլային: Նրա մահից հետո զարդը ժառանգել է որդին։ Նա պատմել է, որ արքայադուստր Դիանան իսկապես սիրում էր զարդերը եւ հաճախ էր որոշ ժամանակով խնդրում դրանք։

 «Մահացած արքայադուստր Դիանային պատկանող կամ կրած զարդերը շատ հազվադեպ են հայտնվում շուկայում, հատկապես Աթթալայի խաչի նմանները: Մենք վստահ ենք, որ 1920-ականների այս բացառիկ ծագմամբ ու եզակի զարդը, որը կրել է միայն ինքը՝ արքայադուստրը, կգրավի մեծ թվով գնորդների»,- հայտարարել են Sotheby’s-ում։